თურქეთში, გუშინ მომხდარი მიწისძვრის შედეგად, მინიმუმ 3 ადამიანი დაიღუპა და ასობით დაშავდა - მედიის ინფორმაციით, ქუჩებში შიში და პანიკაა

სამხრეთ თურქეთში გუშინ მომხდარი 6.4 მაგნიტუდის სიმძლავრის მიწისძვრის შედეგად მინიმუმ 3 ადამიანი დაიღუპა, - ინფორმაციას BBC-ი ავრცელებს.

გამოცემის ცნობით, თურქეთსა და სირიაში 680-ზე მეტი ადამიანი დაშავდა, აქედან 213 თურქეთში, 470 კი - სირიაში.

თურქეთის შინაგან საქმეთა მინისტრის, სულეიმან სოილუს განცხადებით, მიწისძვრის შედეგად დაღუპულები ანტაკიაში, დეფნესა და სამანდაგში აღმოაჩინეს. მინისტრმა მოქალაქეებს მოუწოდა, პოტენციურად საშიშ შენობებში არ შევიდნენ.

მედიის ინფორმაციით, ქუჩებში შიში და პანიკაა. სასწრაფო სამედიცინო დახმარების მანქანები და სამაშველო ბრიგადები ცდილობენ ყველაზე დაზარალებულ ტერიტორიებს მიაღწიონ, სადაც 6 თებერვლის მიწისძვრის შედეგად დაზიანებული შენობების კედლები ჩამოინგრა.

• ნახეთ ასევე: "იყო უზარმაზარი ბიძგები..." - რა კადრები ვრცელდება ჰათაიდან, სადაც რამდენიმე წუთის ინტერვალით ორი ძლიერი მიწისძვრა მოხდა