ბულგარეთში, სატვირთო მანქანაში 18 ცხედარი იპოვეს - "იქ არ იყო საკმარისი ჟანგბადი. სციოდათ, იყინებოდნენ, თან რამდენიმე დღე არაფერი უჭამიათ"

ბულგარეთის პოლიციის ცნობით, ქვეყნის დედაქალაქ სოფიასთან ახლოს მდებარე ერთ-ერთ დიდ სოფელში, იპოვეს სატვირთო მანქანა, რომელშიც 18 ცხედარი ნახეს.

წინასწარი ინფორმაციით, ისინი მიგრანტები უნდა იყვნენ, რომლებიც უჰაერობით დაიღუპნენ იმ დროს, როდესაც საზღვარზე არალეგალურად გადაჰყავდათ.

პოლიციის ინფორმაციით, სატვირთოში დაახლოებით, 40 ადამიანი იყო, რომლებიც ხე-ტყის ტვირთის ქვეშ იმალებოდნენ. მედიის ინფორმაციით, 14 ადამიანი ცოცხალი ნახეს და გადაიყვანეს საავადმყოფოში, მათგან 8 უმძიმეს მდგომარეობაშია. კიდევ 10 ადამიანი მიმდებარედ იმალებოდა, ისინიც საავადმყოფოში გადაიყვანეს გამოკვლევისთვის. იმ ხალხის ძებნა, რომლებსაც მიგრანტები არალეგალურად გადაჰყავდა, გრძელდება. მიმალულია სატვირთოს მძღოლიც. "არ შემიძლია ზუსტად ვთქვა, რა მოხდა. იქ არ იყო საკმარისი ჟანგბადი. მათ სციოდათ, იყინებოდნენ, თან რამდენიმე დღე არ უჭამიათ", - განაცხადა ბულგარეთის ჯანდაცვის მინისტრმა ასენ მეჯიდიევმა. ერთ-ერთი რადიოსადგურის ცნობით, მიგრანტები ავღანეთიდან არიან. წყარო