6-წლიანი პატიმრობა "ტელეგრამში" გამოქვეყნებული პოსტისთვის - რუსი ჟურნალისტი მარია პონომარენკო ბრალდებას არ აღიარებს და ამბობს, რომ საპატიებელი არაფერი აქვს
მარია პონომარენკოს, ჟურნალისტს რუსეთის ქალაქ ბარნაულიდან, სასამართლომ 6 წლით თავისუფლების აღკვეთა მიუსაჯა. ამის მიზეზი აპრილში მარიუპოლის დრამატულ თეატრზე თავდასხმის შესახებ სოციალურ ქსელში გავრცელებული პოსტი გახდა. გარდა ამისა, ქალს ხუთი წლით ეკრძალება ჟურნალისტური საქმიანობა.
ბარნაულის სასამართლომ RusNews-ის თანამშრომელი დამნაშავედ ცნო "რუსეთის არმიის შესახებ ცრუ ინფორმაციის გავრცელებაში“ (რუსეთის ფედერაციის სისხლის სამართლის კოდექსის 207.3 მუხლის მე-2 ნაწილი). მარია პონომარენკოს განაჩენის შესახებ ინფორმაცია გამოცემამ, სადაც ის მუშაობდა, ასევე მისმა ადვოკატმა დაადასტურეს.
პროკურატურა პონომარენკოსთვის ცხრაწლიანი პატიმრობის მისჯას ითხოვდა. ქალის განცხადებით, მას არ მოუთხოვია სასამართლოსგან ლმობიერება, რადგან თავს დამნაშავედ არ მიიჩნევს. ქალი ამბობს, რომ მას საპატიებელი არაფერი ჩაუდენია, მხოლოდ პროფესიული მოვალეობა შეასრულა...
პონომარენკო 2022 წლის აპრილში დააკავეს. მას ბრალი დასდეს რუსეთის არმიის შესახებ "ყალბი ცნობების გავრცელებაში...“ მიზეზი "ტელეგრამარხზე "არა ცენზურას“ გამოქვეყნებული პოსტი იყო, სადაც ჟურნალისტი ყვებოდა მარიუპოლის დრამატულ თეატრში შეკრებილი ადამიანების დაღუპვაზე. არხს დაახლოებით 1600 გამომწერი ჰყავს.
რუსეთმა არაერთხელ უარყო თეატრის დაბომბვა, თუმცა, ის, რომ დრამატული თეატრი, რომელსაც თავს აფარებდა ასობით მშვიდობიანი მოქალაქე, რუსული სარაკეტო დარტყების შედეგად განადგურდა, ეუთოსა და Amnesty International-ის გამოძიებით დასტურდება.
პონომარენკო 2022 წლის აპრილში დააკავეს და წინასწარი დაკავების იზოლატორში გადაიყვანეს, ნოემბერში კი შინაპატიმრობით გაათავისუფლეს, ქალი ყოფილი ქმრის ბინაში ცხოვრობდა.
იანვრის ბოლოს ცნობილი გახდა, რომ ჟურნალისტი კვლავ დააკავეს. 27 იანვრის ღამეს ყოფილ ქმართან კონფლიქტის შემდეგ, ჟურნალისტი პოლიციაში თავად მივიდა, რის შემდეგაც კვლავ წინასწარი დაკავების იზოლატორში გადაიყვანეს. მეუღლისგან განსხვავებით, ყოფილი ქმარი, მხარს უჭერს უკრაინაში შეჭრას.