ახალ ზელანდიაში ციკლონის გამო საგანგებო მდგომარეობა გამოცხადდა

ახალ ზელანდიაში ციკლონ “გაბრიელეს“ გამო საგანგებო მდგომარეობა გამოცხადდა.

საგანგებო სიტუაციების მართვის მინისტრის, კიერან მაკანულტის განცხადებით, საგანგებო მდგომარეობის გამოცხადება მთავრობის რეაგირებას გაამარტივებს.

ქვეყანაში მინიმუმ 38 000 სახლი ელექტროენერგიის გარეშეა დარჩენილი. უამინდობის გამო, Air New Zealand-მა მინიმუმ 509 ავიარეისი გააუქმა.

ახალი ზელანდიის უდიდეს ქალაქში, ოკლენდში, ხელისუფლებამ 30 მეტრის სიმაღლის კოშკის გარშემო, რომელიც ჩამონგრევის საფრთხის ქვეშაა, 50 სახლიდან ადამიანების ევაკუაცია განახორციელა. ქალაქში ასევე შეიქმნა ათობით საევაკუაციო ცენტრი.

მედიის ინფორმაციით, ერთი მაშველი-მეხანძრე მძიმედ დაშავდა, ერთი კი დაიკარგა და ამ დრომდე ეძებენ.

Metservice-ის პროგნოზით, ციკლონის გამო ახალი ზელანდიის ჩრდილოეთ და ცენტრალურ ნაწილებში უამინდობა გაგრძელდება.