რუსეთში ზემფირა "უცხოელ აგენტად" გამოაცხადეს - "ის ღიად უჭერს მხარს უკრაინას"
რუსეთის იუსტიციის სამინისტრომ, მომღერალი ზემფირა უცხოელი აგენტების სიაში შეიყვანა იმ მოტივით, რომ ის მხარს უჭერს უკრაინას და აკრიტიკებს რუსეთის "სპეციალურ სამხედრო ოპერაციას.“
როგორც რუსეთის სახელმწიფო სააგენტო "ტასი" წერს, იუსტიციის სამინისტროს განცხადებაში ნათქვამია, რომ ზემფირა, რომლის სრული სახელია ზემფირა რამაზანოვა, ღიად უჭერდა მხარს უკრაინას, ის მართავდა კონცერტებს არამეგობრულ ქვეყნებში, საუბრობდა სპეცოპერაციის წინააღმდეგ და მას მხარს უჭერდნენ უცხოური წყაროები.
ზემფირა ბაშკირეთში დაიბადა, მისი კარიერა 1998 წლიდან განვითარდა. მომღერალმა მოიპოვა პოპულარობა რუსეთში და ზოგიერთ, ყოფილ საბჭოთა ქვეყანაში. ცნობილია, რომ რუსეთის უკრაინაში შეჭრის დღიდანვე წინააღმდეგი იყო ომის და თავის ვებგვერდზე ჰქონდა სლოგანი - "არა ომს.“
რუსული მედიის ინფორმაციით, ზემფირამ ომის დაწყების შემდეგ რუსეთი დატოვა და ამჟამად საფრანგეთში ცხოვრობს.