რას აცხადებს რეზნიკოვი თანამდებობიდან მისი შესაძლო გათავისუფლების შესახებ გავრცელებულ ცნობაზე: "სამუდამოდ არავინ არის სავარძელში"
უკრაინის თავდაცვის მინისტრმა ოლექსი რეზნიკოვმა განაცხადა, რომ ის მზად არის გადადგეს, თუ პრეზიდენტი ვოლოდიმირ ზელენსკი მის გადაყენებაზე ბრძანებას გასცემს.
"არცერთი თანამდებობის პირი სამუდამოდ არ არის სავარძელში. არცერთი” , - განაცხადა რეზნიკოვმა პრესკონფერენციაზე და დასძინა: “მე გავაკეთებ იმას, რასაც სახელმწიფოს მეთაური შემომთავაზებს“.
შესაბამისი განცხადება რეზნიკოვმა მას შემდეგ გააკეთა, რაც უკრაინულმა გამოცემა Ukrainska Pravda-მ სამთავრობო და სამხედრო წყაროებზე დაყრდნობით დაწერა, რომ რეზნიკოვი, სავარაუდოდ, მომავალ კვირას გათავისუფლდება თავდაცვის მინისტრის თანამდებობიდან და შეიძლება დაინიშნოს იუსტიციის მინისტრად.
გამოცემის ცნობით, მისი სავარაუდო შემცვლელი უკრაინის სამხედრო დაზვერვის უფროსი კირილო ბუდანოვია.