"დღეს კეზერაშვილი პარტიაში ვითარების დალაგებას ცოლისძმის ხელით ცდილობს, რაც ვანოს შეიძლება დიდად არც მოსწონს" - რას ჰყვებიან "ნაციონალური მოძრაობის" კულუარებში?
"ნაციონალური მოძრაობის“ ახალმა თავმჯდომარემ ლევან ხაბეიშვილმა მოსვლისთანავე საკმაოდ ხმაურიანი და, ცოტა არ იყოს, გაუგებარი განცხადება გააკეთა, რამაც პარტიაში ახალი დაპირისპირება გამოიწვია. როგორც მან თქვა, პარტია მზად არის პრეზიდენტ სააკაშვილის თავისუფლების სანაცვლოდ, დათმოს როგორც ენმ-ს ოფისი, ასევე, დატოვოს პარლამენტისა და საკრებულოების მანდატები.
ამ სადავო შეთავაზებასთან დაკავშირებით, ხაბეიშვილს მეორე დღეს განმარტებების გაკეთება მოუწია. როგორც ის ამბობს, ყველაფერი, რასაც ამბობს, სააკაშვილის გადარჩენას ემსახურება. "ნაციონალური მოძრაობის" საპარლამენტო ფრაქციის უკვე ყოფილმა თავმჯდომარე ხატია დეკანოიძემ ხაბეიშვილის წინადადება პოპულისტურად შეაფასა და თავმჯდომარეს სპეკულაციებისგან თავშეკავება ურჩია.
ხაბეიშვილის განცხადება ზოგიერთებმა "გარიგების მცდელობად“ შეაფასეს - პოლიტოლოგები არ გამორიცხავენ, რომ ენმ გაურიგდა "ოცნებას“, რომელიც ანეიტრალებს როგორც სააკაშვილს, ისე მის პარტიას და იმ ვერსიასაც ანვითარებენ, რომ შესაძლოა, ისტორია განმეორდეს და 2016 წლის მსგავსად, პარტია კიდევ ერთხელ გაიყოს.
რა ხდება ყველაზე მსხვილ, აწ უკვე ორად გახლეჩილ ოპოზიციურ პარტიაში ლევან ხაბეიშვილის არჩევის შემდეგ და მოვლენების როგორ განვითარებას პროგნოზირებენ თავად პარტიის წარმომადგენლები, ამაზე ambebi.ge-ს სანდო წყარო უყვება:
"ნაციონალების" ნაწილში ხელისუფლებასთან გარიგების ეჭვი არსებობს. ხაბეიშვილის უკან მდგარ ჩრდილოვან ტიპებს საქმე აქვთ დიდ ფულთან, რომელიც მათ სახელმწიფო სამსახურში ყოფნის დროს იშოვეს. ხაბეიშვილი არ არის იმ ტიპის პოლიტიკოსი, პარტიის საქმე წაღმა წაიყვანოს. მას არა მარტო სახელისუფლო პოლიტიკური ძალები, ოპოზიციური სპექტრიც არ აღიქვამს სერიოზულ ლიდერად. მისმა სკანდალურმა განცხადებამ განცვიფრება გამოიწვია მელიას ფლანგზე, მათთვის გაუგებარია, რას ემსახურებოდა განცხადება, რომელიც დაბალ პოლიტიკურ კლასზე მიანიშნებს. გამოდის ისე, რომ "ნაციონალებს" არ აქვთ საპარლამენტო საქმიანობის უნარი და ქუჩის პოლიტიკოსები არიან. რა სასაცილოა, ბიძინას რა ჯანდაბად უნდა ჩვენი ოფისი? არ ესმით, რომ ბიძინა თუ ანადგურებს "ნაციონალურ მოძრაობას“, ანადგურებს მიშას და - პირიქით, ცალ-ცალკე ეს არ გამოდის. ბიძინა ცდილობს, რომ ენმ გაანადგუროს, რათა 2024-ში კონკურენტი არ ჰყავდეს და თავმჯდომარე რომ ხარ, თვითონ აცხადებ კაპიტულაციას და ერთ დღეში ანადგურებინებ? ეს შეიძლება იყოს გარიგების "ვორდინგი" - გაუშვი მიშა და ყველაფერს დაგითმობთ. მელიას უკან ახალაია ნამდვილად არ დგას, მისი ერთ-ერთი კოზირი ისაა, რომ ძველი სახეები, რომლებიც ძალადობასთან ასოცირდებოდნენ, ჩამოიშორა - ვანო თუ არ მიიღო, ახალაია იგივე არაა? თუმცა ახალაიას ჯგუფი შესაძლოა, არ თანაუგრძნობდეს ვანოს, ვინაიდან ბაჩო და ვანო ხელისუფლებაში ყოფნის დროსაც კონფრონტაციაში იყვნენ.
მელიამ 40% აიღო, რაც არაა პატარა ციფრი და გამოდის, რომ ენმ-ს ერთობის შენარჩუნება თუ არ მოხდება პოლიტიკური ფრაქციების სახით, პარტია გაიყოფა და მელიას თავისი ელექტორატი გაჰყვება. თუმცა მან თქვა, რომ სანამ მიშა არ გათავისუფლდება, გადაწყვეტილების მიღებას არ აპირებს. შესაძლოა, ვანოს მხრიდან ბიძინასთან არის ასეთი გარიგება (არ ვიცი, ამაში მიშა მონაწილეობს, თუ - არა), რომ პარტიის დათმობის ხარჯზე გაუშვან მიშა, შეიძლება ხაბეს "ვორდინგი“ იმის ნიშანიც იყოს, რომ ამაზე გარიგდნენ. პარტიის დათმობა უკვე მოხდა - ხაბესნაირ კაცს რომ მოიყვან სათავეში, ეს ნიშნავს დათმობას. პრაქტიკული გამოცდილება არ ნიშნავს იმას, რომ გაგაჩნია პოლიტიკური ინტელექტი. მიშამ იმიტომ მიულოცა ხაბეს, რომ მისი სურვილია პარტია არ გაიყოს, არ დაიშალოს, წინააღმდეგ შემთხვევაში, ის რომელიმეს მხარეს დაიჭერდა. "ნაციონალებში" არის მოლოდინი, რომ ენმ 2016 წლის ანალოგიურად გაიყოფა. მაშინ პარტიამ მონოლითი შეინარჩუნა, დაკარგა წყება მოლაპარაკე თავების, თუმცა დარჩა ელექტორატი. ჩათვალეთ, რომ ნიკა დიდ ელექტორატს წაიყვანს. ეს რომ არ მოხდეს, მიშამ რომელიმეს მხარე უნდა დაიჭიროს - რომელ მხარესაც ის დაიჭერს, ელექტორატიც იმ მხარეს წავა. საბოლოოდ, პარტიის ბედი მასზეა დამოკიდებული. რომელ მხარესაც მიშა არ დაიჭერს, ის აღმოჩნდება "ევროპული საქართველოს“ როლში.
ვანო ხაბეიშვილს პარტიას გაანადგურებინებს, ახლა თუ მიშა გაუშვეს, ეს რაღაც შეთანხმების საფუძველზე მოხდება და 2024-ში "ოცნება“ უმრავლესობით მოვა ხელისუფლებაში. ვანო კერკეტი კაკალია და არ წავა პოლიტიკიდან, ამასთანავე, არავინ იცის, 7-წლიანი პატიმრობის ბოლოს, მერაბიშვილი ვისთან რაზე შეთანხმდა. არაა გამორიცხული, რომ ახლა ის და ბიძინა ერთ თამაშს თამაშობდნენ, მათი მიზანია, მიშა გაუშვან, ენმ დაასუსტონ და 2024-ში პროპორციულში უმრავლესობით მოვიდეს "ოცნება“, ყველაფერი აქეთ მიდის.
ერთიცაა, მიშა ისეთ მდგომარეობაშია, 2024-მდე ფორმაში ვერ ჩადგება, ამასობაში კი სხვა მახეებიც იქნება მოფიქრებული, რათა "ოცნებამ“ ხელისუფლება გაიხანგრძლივოს. ნიკა მელიას დისკრედიტაცია დიდი ხანია მიდის. ის პარტიის მაკონსოლიდირებელი იყო და საკმაოდ აქტიურიც, თუმცა აგორებულმა საინფორმაციო პროპაგანდამ, დაებრალებინათ მელიასთვის ყველაფერი, მისი დისკრედიტაცია გამოიწვია. 2024-მდე ჯერ დროა, "ოცნება“ არ ჩქარობს მიშას გაშვებას, მისი გარანტიების იმედი არ აქვთ, რადგან მიშა თუ გავიდა და დროზე მომჯობინდა, ვანოს და კეზერაშვილს თუ დაიფრენს და ელექტორატს მელიას გარშემო გაერთიანებისკენ მოუწოდებს, პარტიის შენარჩუნებაც მოხდება და ელექტორატის კონსოლიდირებაც, ეს კი ქოცებს არ აწყობთ. ბიძინა არის ტაქტიკოსი და ტაქტიკით ცდილობს 2024 მოიგოს, მან თუ ახლა არ გაანეიტრალა ენმ, დიდი შანსია, პროპორციულში დამარცხდეს. ერთადერთი საშუალებაა ჩვენი პარტიის დასუსტება და განეიტრალება, აქეთ მიდის საქმე და ამას აკეთებს ქვეშქვეშა და გონებამახვილი ვანიჩკა. არც ისაა გამორიცხული, რაღაც მომენტში, საჭირო თუ გახდა, ის არენაზეც გამოვიდეს. ჯერჯერობით, ბიძინას ინტერესში შედის, რაც შეიძლება მეტი სისულელე თქვას ხაბემ და პარტიის მეტი დისკრედიტაცია მოახდინოს“.
ერთ-ერთი კულუარული ინფორმაცით კი შესაძლოა, ურთიერთობა მერაბიშვილსა და კეზერაშვილს შორისაც არ იყოს დიდად დალაგებული.
"დღეს კეზერაშვილი "ნაციონალურ მოძრაობაში" ვითარების დალაგებას ცოლისძმის დიმიტრი ჩიქოვანის ხელით ცდილობს, რაც ვანოს შეიძლება დიდად არც მოსწონს, თუმცა ამ ეტაპზე ალბათ აიტანს. ვერ წარმომიდგენია, როგორ უნდა იყოს მელია იმ პარტიაში, რომელიც ჩიქოვანის ჭკუაზე ივლის... სწორედ ნიკამ გაუშვა ეს პარტიიდან. თითქმის დარწმუნებული ვარ, რომ პარტიის გაყოფა გარდაუვალია", - ამბობს კიდევ ერთი სანდო წყარო ambebi.ge - სთან.
დიმიტრი ჩიქოვანი მედიის ყურადღების ცენტრში შარშან მოექცა, როდესაც 2022 წლის იანვარში "ნაციონალურმა მოძრაობამ" ახალი სამდივნო წარადგინა. ამ სიაში საზოგადოებასთან ურთიერთობისა და კომუნიკაციების მდივნად დასახელებული იყო თავდაცვის ექსმინისტრ დავით კეზერაშვილის ცოლისძმა დიმიტრი ჩიქოვანი. გასული წლის ივლისში კი გავრცელდა ინფორმაცია, რომ ნიკა მელიასა და დავით კეზერაშვილს შორის ურთიერთობა დაიძაბა, შედეგად კი კონფლიქტი მოხდა მელიასა და ჩიქოვანს შორის, რის მერეც მას პარტიიდან წასვლა მოუწია. ამჟამად ჩიქოვანი აქტიურად უჭერდა მხარს ლევან ხაბეიშვილს და მისი გამარჯვების შემდეგ კი, როგორც ამბობენ, დავით კეზერაშვილი თვალი და ყური იქნება...
საინტერესოა, რომ 1-ლ თებერვალს, "ნაციონალური მოძრაობის" წევრი, გიორგი გაბელია დავით კეზერაშვილის ცოლის ძმის მხრიდან ზეწოლაზე ალაპარაკდა. მისი თქმით, გაბელია 2012 წლიდან წალენჯიხის "ნაციონალური მოძრაობის" facebook გვერდს მართავდა, თუმცა ამის უფლება ჩამოართვეს. "მომივიდა მეილზე მესიჯი, რომ ჩახსნილი ხარ ენმ-ს ადმინობიდან. 4 ადამიანი ვიყავით, ამის მერე მირეკავს დიმიტრი ჩიქოვანი და მეუბნება, რომ პირადად მე ჩაგხსენი ადმინობიდანო. როცა ვკითხე, რატომ-მეთქი, პარტიის საკუთრებაა და ესე გადავწყვიტეო. პარტიაში, როგორც გავიგე, არანაირი თანამდებობა არ უკავია და როგორც მითხრეს, არის ბატონი დავით კეზერაშვილის ცოლის ძმა. 24 საათის არჩეულია პარტიის თავმჯდომარედ და უკვე წმენდაა. მთავარი დარტყმა იყო ამაზე, რომ რადგან ნიკა მელიას ვედექით გვერდში, მოხდა ასეთი რამ," - განაცხადა გაბელაიამ. წაიკითხეთ სრულად
რაც შეეხება ხაბეიშვილის ფრთას, ისინი კვლავ აანონსებენ, რომ მელიაზე ბევრი კომპრომატი აქვთ, რასაც როცა საჭიროდ მიიჩნევენ, გამოაქვეყნებენ. მოკლედ, შეიძლება ითქვას, რომ არეულობა მთავარ ოპოზიციურ პარტიაში ჯერ მხოლოდ იწყება...
იხილეთ ასევე: