ნინო ლომჯარიას და მის გუნდს აშშ-ის სახელმწიფო დეპარტამენტმა ადამიანის უფლებათა დამცველის ყოველწლიური, გლობალური ჯილდო გადასცა
საქართველოს ყოფილ სახალხო დამცველს ნინო ლომჯარიას და მის გუნდს აშშ-ის სახელმწიფო დეპარტამენტმა ადამიანის უფლებათა დამცველის ყოველწლიური გლობალური ჯილდო გადასცა.
ამის შესახებ ინფორმაციას ნინო ლომჯარია "ფეისბუქის" საკუთარ გვერდზე ავრცელებს.
"მქონდა პატივი მიმეღო ამერიკის სახელმწიფო დეპარტამენტის "2022 წლის ადამიანის უფლებების დამცველების გლობალური ჯილდო" მე და ჩემი გუნდის მიერ გამოჩენილი სიმამაცისა და ლიდერობისთვის ადამიანის უფლებების დაცვის გზაზე. გამარჯვებულები სახელმწიფო მდივნის მოადგილემ, ურზა ზეიამ და სახელმწიფო მდივნის ასისტენტმა, ერინ ბარკლიმ დააჯილდოვა. დიდი მადლობა ამერიკის სახელმწიფო დეპარტამენტის თანამშრომლებს და ამერიკის საელჩოს საქართველოში, რომლებმაც მხარი დამიჭირეს აღნიშნულ ჯილდოზე წარმომედგინა ევროპის რეგიონი" - წერს ლომჯარია.
მისივე ცნობით, აღნიშნული ჯილდო მსოფლიოს სხვადასხვა კუთხიდან სულ 10 უფლებადამცველს გადაეცა.
სახელმწიფო დეპარტამენტის ვებსაიტზე ნათქვამია, რომ ნინო ლომჯარიას ხელმძღვანელობით, სახალხო დამცველის ოფისი ითვლებოდა ყველაზე დამოუკიდებელ დემოკრატიულ ინსტიტუტად საქართველოში. დეპარტამენტი მიიჩნევს, რომ ლომჯარიას ომბუდსმენობის პერიოდში, ის და მისი გუნდი ადვოკატირებას უწევდნენ ადამიანის უფლებების დაცვის გაძლიერებას, დისკრიმინაციის აღმოფხვრას ყველა მიმართულებით და ამას ყოველგვარი პოლიტიკური მიკერძოების გარეშე ახერხებდნენ.
ნინო ლომჯარია 2017 წლის 7 დეკემბრიდან, 2022 წლის 8 დეკემბრამდე იყო საქართველოს სახალხო დამცველი.