ვალერი ზალუჟნიმ მემკვიდრეობით მიღებული 1 მილიონი აშშ დოლარი უკრაინის არმიას შესწირა : "ოდნავადაც კი არ დავფიქრებულვარ..."
უკრაინის შეიარაღებული ძალების მთავარსარდალმა, გენერალმა ვალერი ზალუჟნიმ ანდერძით მიღებული ერთი მილიონი აშშ დოლარი უკრაინის ჯარს შესწირა.
ამის შესახებ ინფორმაციას გამოცემა The New York Times- ი ავრცელებს.
მედიის ცნობით, ზალუჟნიმ მემკვიდრეობა აშშ-ში მცხოვრები უკრაინელისგან, 1938 წელს დაბადებული გრიგორი (გრეგორი) სტეპანეცისგან მიიღო.
უკრაინის შეიარაღებული ძალების პრესსამსახურმა აღნიშნული ინფორმაცია, "უკრაინსკა პრავდასთან" დაადასტურა.
"გენერალმა ზალუჟნიმ სრული თანხა გადარიცხა უკრაინის ეროვნულ ბანკში უკრაინის არმიის სპეციალურ ანგარიშზე. ეს 2023 წლის 5 იანვარის საბანკო ტრანზაქციით დასტურდება", - აცნობეს გამოცემას.
"მთელი ჩემი სიცოცხლე მივუძღვენი შეიარაღებულ ძალებს. ოდნავი ეჭვიც კი არ მქონია, რა უნდა გამეკეთებინა მემკვიდრეობის მიღების შემდეგ. ბატონი გრიგორის უკანასკნელი ნება აშკარად იყო ჩემი მეშვეობით უკრაინის არმიის მხარდაჭერა. მადლობელი ვარ. ყველას, ვინც ეხმარება უკრაინის შეიარაღებულ ძალებს" - განაცხადა მთავარსარდალმა.
- რა არის ცნობილი გრიგორი სტეპანეციზე, ვისგანაც ზალუჟნიმ ანდერძი მიიღო
"უკრაინსკა პრავდას" ცნობით, გრიგორი (გრეგორი) სტეპანეცი 1938 წელს უკრაინის ქალაქ ვინიცაში დაიბადა, უმაღლესი განათლება კი მოსკოვის სახელმწიფო უნივერსიტეტში მიიღო. გამოცემის ცნობით, სტეპანეცმა ომის საშინელი შედეგები საკუთარ თავზე ჯერ კიდევ ბავშვობაში იწვნია.
მისი მამა მეორე მსოფლიო ომში იბრძოდა და ის გერმანელებმა მოკლეს. ამის შემდეგ, მას და დედას ბევრი დაბრკოლების გადალახვა მოუწიათ.
პროფესიით მათემატიკოსმა სტეპანეცმა საბჭოთა კავშირი 1989 წელს დატოვა და გაემგზავრა აშშ-ში, სადაც კომპანია Microsoft-ში მუშაობდა.
- ვინ არის ვალერი ზალუჟნი, რომელსაც უკრაინელები "რკინის გენერალს" უწოდებენ
უკრაინელები აფასებენ ზალუჟნის დამსახურებას ქვეყნის თავისუფლებისთვის ბრძოლაში. მას უკრაინაში გმირს და "რკინის გენერალს" უწოდებენ და ამბობენ, რომ ის თანამედროვე თაობის სამხედრო, ახალი ეპოქის ჯარის ნაწილია.
თავად ზალუჟნი გაურბის პოპულარობას და ცდილობს, საზოგადოებაში ნაკლები ილაპარაკონ მასზე, როგორც სახელგანთქმულ გენერალზე.
ზალუჟნის უკავშირდება უკრაინის სამხედრო ძალების სტრუქტურაში ცვლილებების შეტანა. მათ შორის, რეორგანიზაციის პროცესში, ის პირები გაათავისუფლა, რომლებიც ძველებური, საბჭოთა მიდგომის მომხრეები იყვნენ და ასეთები უკრაინის ჯარს მრავლად ჰყავდა.
"რკინის გენერალი" 1973 წლის ივლისში, ქალაქ ნოვოგრად-ვოლინსკში, ჟიტომირის ოლქში დაიბადა. მისი მამაც სამხედრო იყო. სწავლობდა ოდესის სამხედრო აკადემიის სახმელეთო ჯარების ინსტიტუტსა და კიევის ეროვნული თავდაცვის აკადემიაში, რის შემდეგაც მუშაობდა სხვადასხვა პოსტებზე, მათ შორის, ის იყო მექანიზებული ბრიგადის მეთაური.
უფრო ვრცლად ვალერი ზალუჟნის შესახებ იხილეთ სტატია: