მაგდა პაპიძე საჯარო ბოდიშს ითხოვს მათგან, ვინც მის ქორწინებაზე ინფორმაცია გაავრცელა - მსჯავრდებული საგამოძიებო ორგანოებს მიმართავს: რას ჰყვება ადვოკატი?
"ჯორჯიან თაიმსის" გავრცელებულ ინფორმაციას, რომ მსჯავრდებულმა მაგდა პაპიძემ თავის თანაკლასელზე ციხეში იქორწინა, კატეგორიულად უარყოფს როგორც პენიტენციური დაწესებულება, ასევე მსჯავრდებულის ადვოკატი ეკა ქობესაშვილი. ადვოკატმა პაპიძე დღეს ციხეში მოინახულა. მისი თქმით, პაპიძემ საქმის გამოძიების მოთხოვნით 24 იანვარს საჩივრის წერილები გააგზავნა როგორც პროკურატურაში, ისე თბილისის საქალაქო სასამართლოში. ასევე უახლოეს დღეებში ჟურნალისტური ეთიკის ქარტიასაც მიმართავს და ცრუ ინფორმაციის გავრცელებისთვის ჟურნალისტის პასუხისმგებლობას მოითხოვს.
"ადამიანის უფლებათა ცენტრის" იურისტი ეკა ქობესაშვილი:
- დღეს შევხვდი მაგდას რუსთავის ქალთა დაწესებულებაში, იცოდა გავრცელებული ინფორმაცია, ფაქტი უარყო, ამბობს, რომ სიცრუეა, სრული აბსურდია. ამის გამო აპირებს ბრძოლას. მოითხოვს პასუხისმგებლობა დაეკისროს იმ პირს, ვინც ეს ინფორმაცია მიზანმიმართულად გაავრცელა. ფიქრობს, რომ ეს მის წინააღმდეგ მიზანმიმართულად გავრცელებული ინფორმაციაა და არის მისი ფსიქოლოგიური ტერორის კიდევ ერთი მცდელობა. ძალიან გაბრაზებულია. ამბობს, რომ არანაირი კონტაქტი არავისთან არ ჰქონია და მსგავსი საუბარი არც ყოფილა. ჩივის, ითხოვს გამოძიებას. ჩვენს ორგანიზაციას გასული წლის მიწურულს მოგვმართა თხოვნით, რომ დაგვეცვა მისი უფლებები, რათა საპატიმროში არსებული პირობები გაუმჯობესდეს. ამ თვალსაზრისით ვხვდებით მას. დღეს იყო ჩვეულებრივი ვიზიტი, ისედაც დაგეგმილი გვქონდა, რადგან მივიღეთ ციხიდან მისი წერილი და ეს ხმაურიანი ამბავიც ამ ვიზიტს დაემთხვა. აბსოლუტური სიცრუეა რაც გავრცელდა.
- მაგდა კონკრეტულად ვის უჩივის?
- უჩივის პირველწყაროს, იმ ჟურნალისტს, ვინც ეს ამბავი ცალმხრივად გააშუქა. ამბობს, ჟურნალისტს თავისუფლად შეეძლო ჩემი დედისთვის, დისთვის, ან თუნდაც პენიტენციური სამსახურისთვის მოემართა და გადაემოწმებინა ეს ინფორმაციაო. ასევე ითხოვს იმის გამოძიებას, თუ ვინ არის დაინტერესებული მისი მისამართით ასეთი ცრუ ბრალდების გავრცელებით. ასევე გავრცელდა არასწორი ინფორმაცია, თითქოს ოჯახის წევრები არ ხვდებიან მას დაწესებულებაში. ესეც არასწორია, მე როცა ვიყავი მისული შეხვედრაზე, მაშინაც იყვნენ პაემანზე ოჯახის წევრები. მას კონტაქტი აქვს ჩვეულებრივ თავის ოჯახთან და ესეც ცრუ ინფორმაციაა. ის ხვდება დედას დას, ისინი სარგებლობენ პაემნის უფლებით ჩვეულებრივად და სატელეფონო ზარების უფლებით. სატელეფონო საუბრის მთელ დროს იყენებს ოჯახთან კომუნიკაციისთვის.
- ალბათ ეკონტაქტებით მისი დას და დედას, მათ რა რეაქცია ჰქონდათ გავრცელებულ ინფორმაციაზე?
- მათ რეაქციაზე ვერ გავაკეთებ განცხადებას, ერთს გეტყვით, ისინიც უარყოფენ კატეგორიულად ამ ფაქტს. მსგავსი არაფერი ყოფილა მის ცხოვრებაში.
- თქვენ ამბობთ, რომ პაპიძე რეჟიმის შეცვლას ითხოვს...
- ჯერჯერობით არაფერი შეცვლილა ამ კუთხით და ჩვენ ვაპირებთ ამ საკითხზე მუშაობას, ვფიქრობთ, რომ მივაღწევთ შედეგს. შვიდი წელია სამარტოო საკანში იხდის სასჯელს. ცხოვრობს პატარა საკანში, მას შეზღუდული აქვს მოძრაობისა და სუფთა ჰაერზე ყოფნის უფლება, მხოლოდ ერთ საათს ატარებს ჰაერზე, რომელიც ასევე პატარა, ბეტონის საკანია, უბრალოდ, დახურული ჭერის ნაცვლად არის გისოსები, საიდანაც იღებს ჰაერს და ჩანს ცა, სხვა არაფერი. ამიტომ ვფიქრობთ, რომ რეჟიმი უნდა შეიცვალოს და ეხმარებით ამის მოგვარებაში.
- ეს რეჟიმი ხომ მას სასამართლოს გადაწყვეტილებით მიესაჯა, რატომ უნდა შეეცვალოს რეჟიმი?
- არ უნდა ირღვეოდეს მისი ჯანმრთელობის უფლება, მისი ადამიანური უფლებები რომ იყოს დაცული საჭიროა რაღაცეების გაკეთება. ის ითხოვს მეტი აქტივობის მიცემის შესაძლებლობას. დახურული რეჟიმი რომ აქვს მისჯილი ეს იმას არ უნდა ნიშნავდეს, რომ არ მოხდეს მდგომარეობის შემსუბუქება. შეუძლია პენიტენციურ დაწესებულებას მეტი შეღავათი გაუწიოს მას და მეტ სივრცეში გადაადგილების საშუალება მისცეს. ვფიქრობთ, მას უნდა მიეცეს ჰაერზე ყოფნისთვის და ფიზიკური აქტივობისთვის მეტი სივრცე, მეტი დრო, რათა მისი ჯანმრთელობის მდგომარეობა კიდევ უფრო მეტად არ გართულდეს. ერთ ჩვეულებრივ საკანში ცხოვრობს მთელი დღის განმავლობაში, სხვა პატიმრებთან კომუნიკაცია არ აქვს. იღებს სამედიცინო დახმარებას, მაგრამ რაც არ უნდა მიიღოს მედიკამენტები, ეს საკმარისი არ იქნება, თუ გამოკეტილი იქნება პატარა ოთახში.
- ხომ არ აქვს ეჭვი, ვინ გაუვრცელა მას ეს ინფორმაცია, სიუჟეტში იყო საუბარი, რომ რესპოდენტი მისი ოჯახის ახლობელი იყო
- ამბობს, რომ არ ჰყავს ოჯახის ახლობელი ისეთი, ვინც ასეთი ტიპის კომენტარს გააკეთებდა და ცრუ ინფორმაციას გაავრცელებდაო. ამიტომ ითხოვს გამოძიებას და ელოდება ინფორმაციის პირველწყაროსგან ბოდიშის მოხდას. ვინც გაავრცელა ცრუ ამბავი, იმას უჩივის და როგორც გითხარით შეტანილი აქვს საჩივარი და ითხოვს საჯაროდ ბოდიშის მოხდას და ფაქტების უარყოფას საჯაროდ ამ ჟურნალისტის მიერ.