შტორმი და ძლიერი ყინვა აშშ-სა და კანადაში - გადაიდო ფრენები, ჩაიკეტა გზები, გარდაიცვალა ათობით ადამიანი (ფოტოები)

აშშ-სა და კანადაში ძლიერ ყინვას და შტორმს მინიმუმ 38 ადამიანის სიცოცხლე ემსხვერპლა. ინფორმაციას BBC-ი ავრცელებს. ბოლო ცნობების მიხედვით, ამერიკის შეერთებულ შტატებში ყინვის შედეგად 34 ადამიანია დაღუპული, თუმცა ვარაუდობენ, რომ მსხვერპლთა რაოდენობა გაიზრდება, რადგან არიან დაკარგულები და ისეთი ადამიანები, რომლებიც ყინვის დროს გარეთ აღმოჩნდნენ და ჯერჯერობით, მათ ვერ მიაკვლიეს.

ქვეყანაში ყველაზე მეტად ნიუ-იორკის შტატის ქალაქი ბუფალო დაზარალდა. 4 ადამიანი დაიღუპა კანადაში, როდესაც ავტობუსი ქალაქ მერიტთან მოყინულ გზაზე გადატრიალდა.

აშშ-სა და კანადაში შტორმის გამო 1.7 მილიონამდე ადამიანი ელექტროენერგიის გარეშე იყო დარჩენილი, თუმცა ელექტროენერგიის აღდგენა სტაბილურად მიმდინარეობს და ეს რიცხვი ამ დროისთვის დაახლოებით, 200 000-მდე შემცირდა.

უამინდობის გამო ათასობით ფრენა გაუქმდა, რის გამოც ბევრმა ადამიანმა შობის დღესასწაულის ოჯახთან ერთად გატარება ვერ მოახერხა. გართულებულია სახმელეთო გადაადგილება და სპეციალისტები გასცემენ შესაბამის რეკომენდაციებს და მოქალაქეებს ურჩევენ, თავი შეიკავონ გადაადგილებისგან.

სინოპტიკოსების ცნობით, ყინვა მთელი კვირის განმავლობაში კვლავ გაგრძელდება.