მძარცველი "გრინჩი", რომელიც რობერტ დე ნიროს "შობას ჰპარავდა" - ჰოლივუდის ვარსკვლავის სახლში შეპარულ ქურდს ნაძვის ხის ქვეშ დაწყობილი საჩუქრები მიჰქონდა

მანჰეტენზე, ჰოლივუდის ვარსკვლავის, რობერტ დე ნიროს სახლში მძარცველი შეიჭრა. ის მსახიობის საახალწლო ნაძვის ხის ქვეშ მოთავსებულ iPad-სა და საჩუქრებში იქექებოდა, როცა პოლიციამ დააპატიმრა.

გავრცელებული ინფორმაციით, მაშინ, როცა ქურდი შეიჭრა, დე ნიროსაც და სახლში მყოფ ოჯახის სხვა წევრებსაც ეძინათ და წარმოდგენაც არ ჰქონდათ, რა ხდებოდა.

30 წლის შენის ევილსი ცნობილი მძარცველია და გავრცელებული ინფორმაციით, ქურდობისთვის ის უკვე 26-ჯერ იყო დაპატიმრებული. როგორც ჩანს, შენისი ვარსკვლავის სახლში სარდაფის კარიდან შეიპარა და იქ იმალებოდა. პოლიციის განცხადებით, ისინი შენისს მანამდეც ადევნებდნენ თვალს, რადგან მანამ, სანამ ქალი დე ნიროს სახლს ამოიღებდა მიზანში, ის აქვე მდებარე კომერციულ შენობებშიც ცდილობდა შეჭრას.

პოლიციის ოფიცრებმა მძარცველის კვალს მისდიეს და საბოლოოდ, შენისი მსახიობის სახლში, მეორე სართულზე აღმოაჩინეს, სადაც ის დე ნიროს კუთვნილი iPad-ით ხელში დახვდათ. "ის საახალწლო საჩუქრებს იპარავდა“,- განაცხადა პოლიციის ერთ-ერთმა ოფიცერმა.

დაკავებულმა მსახიობის სახლში შეჭრის ფაქტი უარყო: "რობერტ დე ნიროს სახლში არ შვსულვარ. არავინ მომიკლავს“,- ეუბნებოდა პოლიციის ოფიცრებს სერიული ქურდი.

წყარო: nypost

მოამზადა: ანა სიბოშვილმა