უკრაინის სახალხო არტისტი, რომელიც სამშობლოში მოღალატედ გამოაცხადეს - ის რუსეთში დარჩა საცხოვრებლად, მისი თურქი ექსქმარი კი დღემდე უკრაინაშია და მოხალისედ მუშაობს

მომღერალი ანი ლორაკი უიშვიათესი ადამიანია იმ უკრაინელ ცნობილ არტისტებს შორის, რომელმაც ომის დაწყების შემდეგ ოკუპანტ რუსეთში საცხოვრებლად დარჩენა და კარიერის გაგრძელება გადაწყვიტა. მას უკრაინაში მოღალატეს უწოდებენ, ამასთანავე, უკრაინული მედია წერს, რომ ლორაკის ყოფილი ქმარი მურატ ნალჩაჯიოღლუ ქვეყანაში დარჩა და უკრაინას სამშობლოს უწოდებს.

კაცმა "ინსტაგრამის" საკუთარ გვერდზე დაწერა, რომ ხშირად ეკითხებიან, რატომ გადაწყვიტა უკრაინაში დარჩენა, როდესაც ქვეყანაში ომია, მაშინ, როდესაც სულ მარტივად შეეძლო თურქეთში დაბრუნება.

"ჩემი აზრით, შენი სამშობლო იქ კი არ არის, სადაც დაიბადე, არამედ ისაა, სადაც ცხოვრობ, სადაც თავს თავისუფლად გრძნობ, ნამდვილი პიროვნება ხარ და ღირსეულად ცხოვრობ. მე უკრაინაში ასე ვგრძნობ თავს", - წერს მურატი.

მურატი ამბობს, რომ მისი სტილი არ არის ქვეყნიდან გაქცევა, სადაც რაღაც არასწორად ხდება. მას უყვარს უკრაინა და მიიჩნევს, რომ სწორად მოიქცა, რადგან აქ დარჩა. კაცი უკრაინაში რუსეთის სრულმასშტაბიანი შეჭრის პირველივე დღეებიდან მოხალისედ მუშაობს და ომით დაზარალებულ უკრაინელებს ეხმარება.

რაც შეეხება ანი ლორაკს, 44 წლის უკრაინელი მომღერალი უკრაინაშია დაბადებული და გაზრდილი, ის ქვეყნის სახალხო არტისტია და 2008 წელს უკრაინა "ევროვიზიის" მუსიკალურ კონკურსზე წარმოადგენდა. ის ამჟამად მოსკოვში ცხოვრობს. 10 დეკემბერს მონაწილეობა მიიღო საახალწლო კონცერტში "Heat," სადაც ახალი კომპოზიცია "ლაბირინთი" შეასრულა, თუმცა კულისებში პრესას არ დალაპარაკებია. საერთოდაც, ის ომის დაწყებიდან რამდენიმე თვის განმავლობაში მედია სივრცეში არ გამოჩენილა. სოციალური ქსელებიც კი წაშალა, რათა არ წაეკითხა მისი მისამართით წამოსული სიძულვილის ტალღა, უკრაინელები წერენ, რომ ის მოღალატეა, რომელსაც უკრაინის სახალხო არტისტის წოდება უნდა ჩამოერთვას.

2022 წლის სექტემბერში უკრაინამ ის სანქცირებულთა სიაში შეიყვანა.