პროკურატურის მტკიცებით, ნაკაიძემ ქალზე იძალადა და მას დაზიანებები მიაყენა, ადვოკატი ამ დაზიანებას პირსინგის ნაკვალევს ადარებს - რა თქვეს მხარეებმა "მთავარი არხის" ყოფილი წამყვანის დახურული სხდომის შემდეგ?

გაუპატიურებაში, ძალადობასა და სიცოცხლის მოსპობის მუქარაში ბრალდებული, "მთავარი არხის" ყოფილი ტელეწამყვანის, ლაშა ნაკაიძის საქმის არსებითი სასამართლო განხილვის მორიგი სხდომა გაიმართა, რომლიც დაიხურა.

საქმის პროკურორის, გიორგი ნადირაძის განცხადებით, დახურული სხდომის გამო, დეტალებზე ვერ ისაუბრებდა, თუმცა, აღნიშნა, რომ დაზარალებულ სამედიცინო დასკვნის მიხედვით, დაზარალებულს მრავალი ფიზიკური დაზიანება აქვს მიყენებული, მათ შორის, მკვრივი ბლაგვი და მსხვილი ბასრი პირის მქონე საგნებით.

"სამედიცინო ექსპერტიზის დასკვნით, დაზარალებულს დაზიანებები აქვს. სამედიცინო ექსპერტიზის კომპეტენცია არ არის, საკითხი შეაფასოს, გაუპატიურებას ადგილი ჰქონდა თუ არა, დასმული კითხვები ეხებოდა იმას, ჰქონდა თუ არა, დაზარალებულს დაზიანებები. რა სახის არის დაზიანებები, სად არის განთავსებული, რა ხანდაზმულობისაა, ასევე სხვა მტკიცებულებებს მხარეები სასამართლოში წარვადგენთ. ბრალდების მხარის გონივრული მოლოდინი არის, რომ წარდგენილი მტკიცებულებებით ბრალდებულის მიერ დანაშაულის ჩადენა დადასტურდება",- განაცხადა ნადირაძემ.

ლაშა ნაკაიძის ადვოკატის, ლალი ბიბილეიშვილის განცხადებით კი, ექსპერტიზის დასკვნის მიხედვით, ნაკაიძეს არც სექსუალურად და არც ფიზიკურად არ უძალადია.

ადვოკატი თქმით, ნაკაიძე წარდგენილ ბრალდებას არ ეთანხმება.

"ექსპერტიზის დასკვნა ისეთია, რაც მაძლევს საფუძველს, შუამდგომლობა დავაყენო გაუპატიურების ნაწილში ძიების შეწყვეტაზე. პიროვნებას ედავებიან გაუპატიურებას, ძალადობას და გეტყვით, რომ დაზარალებულს არც სექსუალური და არც ფიზიკური ძალადობის ნიშნები არ აღენიშნება, დაზიანებები არ აქვს. ლაშა ნაკაიძე რასაკვირველია, ბრალს არ აღიარებს.

გოგონას პირადად არ ვიცნობ. პირსინგს რომ მოიხსნი, კვალი ხომ რჩება? - ეს თუ ვინმემ დაზიანებად ჩათვალა, არ ვიცი. ცხვირზე დაზიანება აქვსო. იძულებით არავინ მოხსნიდა, დარწმუნებული ვარ. ნაკაიძე არ აღიარებს ბრალს, რადგან დღემდე კითხვის ნიშნები აქვს, რა მოხდა მის თავს, ვინ გაწირა“,- განაცხადა ბიბილეიშვილმა.

ცნობისთვის, გამოძიების ინფორმაციით, 15 აგვისტოს, ბრალდებული ლაშა ნაკაიძე გენდერის ნიშნით შეუწყნარებლობის მოტივით, შურისძიების ნიადაგზე დანის და ხმოვანი პისტოლეტის დემონსტრირებით სიცოცხლის მოსპობით დაემუქრა ა.პ.-ს, ასევე სხეულის სხვადასხვა არეში დარტყმით და მჩხვლეტავი საგნის ზემოქმედებით ფიზიკურად იძალადა მასზე. აღნიშნულის შემდგომ, ბრალდებულმა ძალადობით და ძალადობის მუქარით სექსუალურად იძალადა დაზარალებულზე.

სამართალდამცველებმა ბრალდებული 16 აგვისტოს დააკავეს. პროკურატურამ მას ბრალდება საქართველოს სისხლის სამართლის კოდექსის 11 პრიმა 137-ე მუხლის პირველი ნაწილით (გაუპატიურება), 126 პრიმა მუხლის პირველი ნაწილით (ოჯახში ძალადობა) და 11 პრიმა 151-ე მუხლის მე-2 ნაწილის "დ“ ქვეპუნქტით (სიცოცხლის მოსპობის მუქარა ოჯახის წევრის მიმართ) წარუდგინა, რაც სასჯელის სახედ და ზომად 6-დან 8 წლამდე თავისუფლების აღკვეთას ითვალისწინებს.