დაათვალიერეთ საახალწლოდ მორთული გარემო ჭავჭავაძეზე
ზამთარს ბევრი ადამიანისთვის მოაქვს რაღაცნაირი სევდა და მეც მათ შორის ვარ. არ მიყვარს სიცივე და ნაცრისფერ ღრუბლებში დამალული მზე, მაგრამ ჩემთვის ყველაზე ნაკლებად საყვარელ სეზონსაც კი აქვს თავისი დადებითი მხარე… და ეს წინასაახალწლო განწყობაა!
ალბათ არ არსებობს ადამიანი, ვისაც გული არ უჩქროლდება საახალწლოდ მორთულ ქუჩებში სეირნობისას, ვისაც არ ჰგვრის ბედნიერების განცდას გაყინულ თითებს შორის მოქცეული ცხელი გლინტვაინის ჭიქა, ლამაზად მორთული ნაძვის ხე, ოქროსფრად ანთებული მაღაზიების ვიტრინებთან ჩავლა… თქვენი არ ვიცი, მაგრამ მე პირადად წინასაახალწლო განწყობა უფრო მიყვარს, ვიდრე თავად ახალი წელი. და თუ თქვენზეც ჩემსავით მაგიურად მოქმედებს ეს ყველაფერი, ეს ბლოგი თქვენთვისაა!
თუ გსურთ შეიგრძნოთ წინასაახალწლო განწყობა, საღამოს ჭავჭავაძეზე გაისეირნეთ. ოქროსფრად აელვარებული „ბიბლუსი“ თქვენს ყურადღებას შორიდანვე მიიქცევს.
ჯადოსნურად მორთული “ბიბლუსის“ დანახვისას, ცდუნებას ვერ გავუძელი და შესვლა გადავწყვიტე. უფრო სწორად, ფეხებმა თავისით წამიყვანა ციმციმა ნათურებით აფეთქებული, ჩემი საყვარელი წიგნის მაღაზიისკენ.
შესასვლელში, კაფე „პიატოს“ ღია სივრცეში შევდგი თუ არა ფეხი, ვიტრინიდან ნამდვილი ახალი წელი დავინახე, რომელიც „ბიბლუსმა“ შიდა სივრცეში მოაწყო. მექანიკურად ჩავრთე მობილურის კამერა, რადგან ამ ზღაპრული გარემოს თქვენთვის გაზიარების სურვილი გამიჩნდა.
„ბიბლუსში“ შესვლისთანავე ნაძვის ხეებისა და ზღაპრული გმირების გარემოცვაში აღმოჩნდებით.
აქ შეხვდებით ყველა ზომის და ფერის მაკნატუნას, რომლის გარეშეც ალბათ რთულია წარმოიდგინო შობა. მაკნატუნა შობის სიმბოლოა, ყველას გვახსენებს ბავშვობას და უსაყვარლეს მულტფილმს, რომელსაც საახალწლო დღეებში ვუყურებდით.
მგონი, სანტა კლაუსების და თოვლის პაპების ყველაზე გრანდიოზული არჩევანი „ბიბლუსშია“. თუ თქვენც ჩემსავით გიყვართ საშობაო სოფელი, ჩათვალეთ, რომ დროში დაიკარგებით და მომენტალურად, მთელი შეგრძნებით „ლაპლანდიაში“ აღმოჩნდებით.
ვინც აპირებთ სახლში პატარა საშობაო სოფლის მოწყობას, აქ ყველაფერს იპოვით: დათოვლილი ხის ღობეები, სხვადასხვანაირი პატარა სახლები, ნაძვის ხეები, ფიგურები, ანგელოზები, მატარებელი…
ასევე, საახალწლო დეკორაციების ზღვა არჩევანი. სანთლები, სასანთლეები, ფაიფურის და კერამიკის ფიგურები – აქ მართლაც ყველაფერია!
უსაყვარლესი გნომები – ყველა ზომის, ყველა ფორმის.
აქვე, შეგიძლია „პიატოს“ მყუდრო სივრცეში დაჯდე, აიღო უგემრიელესი ყავა, გადაშალო წიგნი და მთელი არსებით შეიგრძნო სადღესასწაულო მაგიის ენერგეტიკა.
სამფენიან უგემრიელეს მოკას ნაღებით ცოტა რამ თუ შეედრება.
ჭიქა ნახევრადტკბილი რქაწითელიც შესანიშნავი არჩევანი იქნება…
აქვე, მშვიდად და აუჩქარებლად შეგიძლიათ შეიძინოთ საახალწლო საჩუქრებიც, ნაძვის ხის სათამაშოებიც… სხვათა შორის, საახალწლო საჩუქრების წინასწარ ყიდვა ძალიან გონივრული გადაწყვეტილებაა! ბოლო დღეებში თავს აარიდებთ უსაშველო რიგებს სალაროებთან, საცობებს და იდეალური საჩუქრების ძებნისგან გამოწვეულ სტრესს.
ლამაზი ფოტოების გადაღება ვისაც გიყვართ, „პიატოს“ ღია სივრცე ამისთვის იდეალურია. განსაკუთრებით ლამაზია ნათურებით გაკაშკაშებული ჭერი, აუცილებლად მოაქციეთ ის თქვენი კამერის ობიექტივში!
ჭავჭავაძის „ბიბლუსიდან“ ემოციით სავსე გამოვედი. ჩემი ოჯახის წევრებისთვის საახალწლო საჩუქრებიც შევიძინე.
და თქვენ რას აპირებთ?
წყარო: თეას ბლოგი