მესის გაფუჭებული პენალტი და შჩენსნის თავგანწირული თამაში: არგენტინამ პოლონეთს მოუგო, თუმცა ჯგუფიდან გასვლა ერთად იზეიმეს - ცნობილია კიდევ 4 მერვედფინალისტი
30 ნოემბერს, მსოფლიო ჩემპიონატზე კიდევ 2 მერვედფინალური წყვილი გამოვლინდა. D ჯგუფში, მართალია, საფრანგეთი ტუნისთან დამარცხდა, მაგრამ პლეი-ოფში მაინც პირველი ადგილით გავიდა. მწვრთნელმა დეშამმა რამდენიმე წამყვან ფეხბურთელს მისცა დასვენების საშუალება და მხოლოდ მეორე ტაიმზე შეუშვა შეცვლაზე. უპირატესობას აფრიკელები ფლობდნენ. 58-ე წუთზე "მონპელიეს“ 31 წლის თავდამსხმელმა ხაზრიმ ლამაზი დრიბლინგის შემდეგ მანდანდას კარი დალაშქრა, რის წყალობითაც ტუნისმა ისტორიული გამარჯვება მოიპოვა, თუმცა ჯგუფში ჩარჩა.
ავსტრალიისა და დანიის მატჩში, ფავორიტად სკანდინავიელები მიიჩნეოდნენ, მაგრამ, ისინი ვერაფერს გახდნენ ავსტრალიელებთან, რომლებმაც მინიმალური ანგარიშით 1:0 იმარჯვეს, ჯგუფიდან მეორე ადგილით გავიდნენ და 2006 წლის შემდეგ პირველად ითამაშებენ პლეი-ოფში.
გაცილებით დრამატული გამოდგა C ჯგუფის ბოლო ტური.
არგენტინამ საუდის არაბეთთან შოკისმომგვრელი პირველი მარცხის შემდეგ, ნელ-ნელა თავისი თამაში იპოვა და ჯგუფური ეტაპის ბოლო მატჩში შთამბეჭდავად გაიმარჯვა პოლონეთთან, თუმცა ნამატჩევს მშვენიერ განწყობაზე იყვნენ პოლონელებიც, რომლებმაც მარცხის მიუხედავად მაინც მოახერხეს ჯგუფიდან გასვლა. მექსიკამ, რომელიც საუდის არაბეთს დაუპირისპირდა, ვერ მოახერხა ბურთების იმგვარი სხვაობით გამარჯვება, რომ პოლონეთისთვის, რომლის მსგავსი ქულებიც დააგროვა, ეჯობნა. საბოლოოდ, მექსიკამ საუდის არაბეთს 2:1 სძლია, მაგრამ ჯგუფში ჩარჩა და 1990 წლის შემდეგ პირველად ვერ ითამაშებს პლეი-ოფში.
უკვე შეიძლება ითქვას, რომ ლიონელ მესი იქცა წინა ტურში, მექსიკასთან გადამწყვეტი გამარჯვების კატალიზატორად, რის მერეც არგენტინა დაუბრუნდა ჩვეულ ფორმას და აჩვენა, თუ რატომ მიიჩნევიან მარადონას თანამემამულეები ჩემპიონატის ერთ-ერთ ფავორიტად. მიუხედავად იმისა, რომ მესიმ თავისივე მოპოვებული პენალტი გააფუჭა, არგენტინამ სრულად დაჯაბნა პოლონეთი და ანგარიშით: 2:0 გაიმარჯვა. ორივე გოლი მეორე ტაიმში გავიდა, ჯერ იყო და შჩენსნის კარი მაკალისტერმა დალაშქრა, მეორედ კი თავი ალვარესმა გამოიჩნა. აუცილებლად უნდა აღინიშნოს პოლონელთა მეკარის შესანიშნავი თამაში. რომ არა მისი ეს თავგანწირული თამაში, სწორედ მან აუღო პენალტი ლეოს, გაცილებით დიდი ანგარიშით წააგებდა პოლონეთი და ჩემპიონატსაც დაემშვიდობებოდა.
მერვედფინალში არგენტინა ავსტრალიას, პოლონეთი კი საფრანგეთს შეხვდება.