"ღმერთმა არ ქნას, სადმე გადავეყარო!" - რატომ ემუქრება მექსიკელი მოკრივე ლიონელ მესის

თანამედროვეობის ერთ-ერთი საუკეთესო მოკრივე, მექსიკელი, საულ "კანელო“ ალვარესი ლიონელ მესის საქციელით აღშფოთებულია.

მსოფლიო ჩემპიონატის მეორე ტურის შემდეგ, როდესაც არგენტინისა და მექსიკის ნაკრებების შეხვედრა დასრულდა, არგენტინის გამოსაცვლელიდან სკანდალური ვიდეო გავრცელდა. კადრებზე ჩანს, რომ მესისთან მექსიკის ნაკრების მაისური გდია, რომელსაც ზეიმის დროს, ფორვარდმა ფეხი დაარტყა და მოისროლა.

თავდამსხმელის საქციელით სუპერსაშუალო წონის აბსოლუტური ჩემპიონი საულ ალვარესი აღშფოთდა.

"თქვენ ნახეთ, როგორ წმენდდა მესი იატაკს ჩვენი მაისურითა და დროშით? ღმერთმა არ ქნას, სადმე გადავეყარო!

ზუსტად ისე, როგორც არგენტინამ უნდა სცეს პატივი მექსიკას, ასევე, ჩვენც უნდა ვცეთ პატივი არგენტინას! ზოგადად არგენტინელებზე არ ვამბობ, ამ შემთხვევაში მესიზე და მის გულისამრევ საქციელზეა ლაპარაკი“, - დაწერა კანელომ "ტვიტერზე".

ცნობისთვის, არგენტინისა და მექსიკის ნაკრებები 26 ნოემბერს დაუპირისპირდნენ ერთმანეთს. მატჩში მესის გუნდმა მისი გოლითა და საგოლე პასით ანგარიშით: 2:0 გაიმარჯვა.

მოამზადა ანრი კურტანიძემ