"არსად და არასოდეს, არც პირადი და არც სამსახურებრივი ახალი მანქანა არ მყოლია" - როგორ ეხმაურება გოგა ხაჩიძე ეპისკოპოს სვიმეონისთვის 120 - ათას დოლარიანი მანქანის ჩუქებას
ორი დღის წინ, სოციალურ ქსელში დეკანოზმა ილია ჭიღლაძემ სტატუსი გამოაქვეყნა, რომლითაც მის ყოვლადუსმღვდელოესობას, სურამისა და ხაშურის ეპისკოპოს სვიმეონს 120 ათას დოლარად ღირებული "ლენდკრუიზერ 300"-ის ყიდვა "მიულოცა"....
"მის ყოვლადუსმღვდელოესობას, სურამისა და ხაშურის ეპისკოპოს სვიმეონ ცაკაშვილს გულითადად ვულოცავ 120 000$ ღირებული ლენდკრუიზერ 300 - 2022 - ის ყიდვას და მარნეულის ეპისკოპოს გიორგი ჯამდელიანთან გათანაბრებას, რომელმაც წინა თვეებში დაასწრო ამ მოდელის მანქანის შეძენა. სჯობს გვიან, ვიდრე არასდროსო, ნათქვამია, გული არ გაიტეხო, "წმინდაო მეუფეო"! ჭეშმარიტად ძმური და ქრისტესმიერი მონაზვნური უპოვარება და უბრალოებაა! ა(ნა)ქსიოს!“ - წერდა ჭიღლაძე... მოგვინებით, ეპისკოპოსმა განაცხადა, რომ მას მანქანა მრევლმა აჩუქა.
სწორედ ამ ფაქტს გამოეხმაურა პოლიტიკოსი გოგა ხაჩიძე. მისი თქმით, ხელისუფლებაში ყოფნის პერიოდში არასოდეს ჰყოლია პირადი მანქანა.
გოგა ხაჩიძე:
"ახალი მანქანა კარგია! რა სჯობს, ახალ მანქანას რომ ყიდულობ, ცელოფნებს აცლი, საწყის კილომეტრებს თითებზე ითვლი, ახლის სუნი მოგწონს, არაფერი ფუჭდება, და ბედნიერი ხარ ალბათ... პოლიტიკამდე, 9 სხვადასხვა მანქანა მყავდა, თუმცა ყველა - მეორადი (ამით იმის თქმა მინდა, რომ მანქანები სულ მომწონდა) ამის შემდეგ, ორჯერ ვიყავი პარლამენტის დეპუტატი, ორჯერ ვიყავი გუბერნატორი, სხვადასხვა რეგიონში და 4 წელი - გარემოს დაცვისა და ბუნებრივი რესურსების მინისტრი.
სურვილის მიუხედავად, არსად და არასოდეს, არც პირადი და არც სამსახურეობრივი ახალი მანქანა არ მყოლია.სულ ვთვლიდი, რომ მაგისთვის არც ფული იყო, არც დრო და არც სიტუაცია. აბა, დადოს ვინმემ მსგავსი სტატისტიკა!... ჰოდა, კი არ მშურს - ვბრაზდები. ამ ქვეყანაში, ამ სიტუაციაში, სხვის, ან ბიუჯეტის ფულით, ახალი მანქანის ყიდვის უკან, ყოველთვის რაღაც უზნეობა და ნაბიჭვრობა დგას! ასეა ეს!"- წერს ხაჩიძე...
შეგახსენებთ, რომ ჯიპის შეძენის ფაქტს, მედიასთან თავად სასულიერო პირიც გამოეხმაურა. მისი თქმით, მანქანა თავად არ შეუძენია და ის მრევლმა „ქართული საქმისთვის“ მიუყვანა...
"ავტომანქანაზე უფრო რაციონალური, მნიშვნელოვანი საკითხი... ბანას პროექტი რომ შენდება, იცით? მე დიდი ხნის წინაც შემეძლო და მრავალი წლის განმავლობაში მთავაზობდა ჩემი მრევლი, რომლის მიმართაც უდიდესი სიყვარული მაქვს - მე მათდამი და მათ ჩემდამი. უარს ვამბობდი. ახლა მოხდა ისე, რომ მრევლმა გადაწყვიტა... წირვაზე მივდიოდი - გზაში დავრჩი, დღესასწაული იყო - გზაში დავრჩით. მოკლედ, არ აქვს ამას მნიშვნელობა, მაგრამ უბრალოდ გეტყვით. მრევლმა გადაწყვიტა, არაერთმა, რომ ამ დიდი საქმისთვის, ბანასთვის, ამხელა საქმეს და ქართულ საქმეს ვემსახურები, ამ ქართული საქმისთვის მომიყვანეს ეს, რომ აღარც გზაში დავრჩე და ამხელა საქმეს ნორმალურად ვემსახურო". - ამბობს სვიმეონ ცაკაშვილი