კიევის ცენტრში რუსული რაკეტები საცხოვრებელ სახლებს მოხვდა - ბოლო ცნობები უკრაინის დედაქალაქიდან (ფოტოები)

კიევის ცენტრში რუსული რაკეტები საცხოვრებელ სახლებს მოხვდა, რამდენიმე საჰაერო თავდაცვამ ჩამოაგდო. ინფორმაციას ამის შესახებ კიევის მერი ვიტალი კლიჩკო და უკრაინის პრეზიდენტის ოფისის ხელმძღვანელის მოადგილე, კირილ ტიმოშენკო ავრცელებენ.

კლიჩკოს თქმით, კიევის პეჩერსკის უბანში რაკეტები ორ საცხოვრებელ სახლს მოხვდა. ადგილზე ექიმები და მაშველები მუშაობენ.

მანამდე კიევის საქალაქო-სამხედრო ადმინისტრაციამ გაავრცელა ცნობა, რომ ქალაქში საჰაერო თავდაცვა მუშაობს, რის შედეგადაც 4 რაკეტა ჩამოაგდეს.

დედაქალაქის მერის ცნობით, რუსეთის თავდასხმების გამო, კიევის მოსახლეობის ნახევარი ელექტროენერგიის გარეშეა დარჩენილი. "მასობრივი სარაკეტო თავდასხმის გამო, ეროვნული ენერგეტიკული კომპანიის "უკრენერგოს” გადაწყვეტილებით, ენერგეტიკოსებმა დაიწყეს შუქის საგანგებო გათიშვა. ეს აუცილებელი ნაბიჯია ენერგოსისტემის დაბალანსებისთვისა და აღჭურვილობაზე ავარიების ასარიდებლად", - წერს კლიჩკო.

წინასწარი ცნობით, დედაქალაქში შუქის გარეშე მომხმარებელთა როგორც მინიმუმ ნახევარი დარჩა”, - წერს კლიჩკო.

პარალელურად ცნობები ვრცელდება საჰაერო თავდაცვის მუშაობაზე უკრაინის კიდევ სამ ოლქში: ვინიცაში, ჩერნიგოვსა და პოლტავაში. ინფორმაციას ადგილობრივი საოლქო-სამხედრო ადმინისტრაციების ხელმძღვანელები ავრცელებენ.

ნახეთ ფოტომასალა კიევიდან, რომელსაც "უნიანი" ავრცელებს.