უკრაინა "კამიკაძე ნავების" ფლოტს ქმნის - რას წარმოადგენს უპილოტო საზღვაო საშუალებები და რამდენად ეფექტიანია მათი დარტყმა საბრძოლო გემებზე?

უკრაინამ მსოფლიოში პირველი უპილოტო შემტევი "კამიკაძე-ნავების" ფლოტის მშენებლობისთვის ფინანსების მოძიება დაიწყო. შესაბამისი კამპანიის პრეზენტაცია პრეზიდენტმა ვოლოდიმირ ზელენსკიმ თავის "ტელეგრამარხზე“ გამოაქვეყნა. მისი თქმით, უკრაინას დრონები სჭირდება, რათა "დაიცვან ზღვები და მშვიდობიანი ქალაქები გემებიდან გაშვებული რუსული რაკეტებისგან“.

ამას გარდა, როგორც ზელენსკი წერს, "კამიკაძე - ნავებები", ანუ საზღვაო დრონები, როგორც მათ ხშირად უწოდებენ, უკრაინის პორტებიდან დატვირთული მარცვლეულის "დაცვისთვის“ და კორიდორის განბლოკვისთვის იქნება გამოყენებული.

ვებგვერდზე UNITED24, სადაც მიმდინარეობს თანხების მოძიება, უკვე გამოქვეყნდა საზღვაო "კამიკაძის" მახასიათებლები, ასევე ვიდეო, რომელშიც ნაჩვენებია მისი ზოგიერთი დეტალი და ვიზუალი.

ცნობისთვის, UNITED24 არის უკრაინის ხელისუფლების მიერ ორგანიზებული პროექტი ქვეყნის დასახმარებლად თანხების მოსაზიდად. საიტი პრეზიდენტმა ვოლოდიმირ ზელენსკიმ გახსნა.

• ავტონომიური აპარატი

საიტმა საზღვაო დრონების ტექნიკური მახასიათებლები გამოაქვეყნა. ეს არის მცირე ზომის მოწყობილობა, რომელსაც მიზანზე დარტყმა თვითდეტონაციის გზით შეუძლია.

მისი სიგრძე 5,5 მეტრია, დიაპაზონი - 800 კილომეტრი, ავტონომია - 60 საათი, მაქსიმალური სიჩქარე - 80 კმ/სთ-ში, ქობინი - 200 კილოგრამი. შედარებისთვის, Harpoon რაკეტის ქობინის მასა 225 კილოგრამია. უკრაინული ნეპტუნის საკრუიზო რაკეტის ქობინი 150 კილოგრამს იწონის.

შესრულების მახასიათებლებით თუ ვიმსჯელებთ, დრონი კონტროლდება სამი ვიდეო არხის მეშვეობით. გარდა ამისა, იგი ასევე აღჭურვილია სატელიტური სანავიგაციო სისტემითა და ავტოპილოტით. ეს კი იმას ნიშნავს, რომ მოწყობილობას თავად შეუძლია იმუშაოს, მათ შორის ელექტრონული ომის სისტემის პირობებში.

"ჩვენი უმთავრესი ამოცანაა 100 ასეთი ფლოტის შეკრება. ისინი დაიცავენ ჩვენს ზღვებს, შეაჩერებენ რუსულ გემებს, დაიცავენ სავაჭრო გემებს და შეასრულებენ საიდუმლო მისიებს", - ნათქვამია საიტზე.

• დრონების ფლოტი

ბოლო წლებში უკრაინა აქტიურად ახორციელებს უპილოტო სისტემებს საჰაერო და საზღვაო ძალებში, მაგრამ ეს შესამჩნევი იყო, პირველ რიგში, ჰაერში - დამკვირვებლებმა მეტი ყურადღება დაუთმეს Bayraktar TB2 მფრინავ თვითმფრინავებს.

თუმცა, როგორც უკრაინის საზღვაო ძალების მეთაურმა, კონტრ ადმირალმა ოლექსი ნეიჟპაპამ 2021 წლის მაისში განაცხადა, იგეგმებოდა ფლოტის აღჭურვა უპილოტო საზღვაო მანქანებით. ამის შესახებ მან ფორუმზე "უკრაინა 30. ქვეყნის უსაფრთხოება“ საზღვაო ძალების განვითარების კონცეფციის წარდგენისას ისაუბრა.

"რა თქმა უნდა, საზღვაო ძალები, ისევე როგორც შეიარაღებული ძალების სხვა ტიპები და განშტოებები და ზოგადად მთელი ცივილიზებული სამყარო, გადადის უპილოტო ტექნოლოგიებზე. ეს არის წინგადადგმული ნაბიჯი", - განაცხადა საზღვაო ძალების მეთაურმა. მისი თქმით, უკრაინა ნაღმსაწინააღმდეგო უპილოტო სისტემების შეძენას აპირებდა.

თუმცა, როდესაც ალექსეი ნეიჟპაპა საუბრობდა ამის შესახებ, მის უკან ეკრანზე აჩვენეს პრეზენტაციის სლაიდი, რომელზეც არა მხოლოდ Bayraktar დრონი და წყალქვეშა ნაღმსაწინააღმდეგო მანქანები იყო გამოსახული, არამედ უპილოტო ნავი და მცირე დისტანციური მართვის ზედაპირული მანქანა.

• რამდენად ეფექტიანი შეიძლება იყოს საზღვაო დრონი?

ასეთი მოწყობილობების ეფექტიანობა დღევანდელი საბრძოლო გემების წინააღმდეგ შეიძლება იყოს უფრო მაღალი, ვიდრე მათ წინააღმდეგ, რომლებიც იბრძოდნენ, მაგალითად, მეორე მსოფლიო ომის დროს.

ფაქტია, რომ მეორე მსოფლიო ომის დროს კრიტიკული სისტემები, რომლებიც უზრუნველყოფდნენ გემის გადარჩენას და საბრძოლო შესაძლებლობებს ამგვარი თავდასხმისას, უფრო ავტონომიური იყო და შესაბამისად, უფრო ადვილი იყო მათი დაცვა ჯავშნით.

თანამედროვე ხომალდი კი იმდენად რთულია, რომ თითქმის ნებისმიერ ნაწილში შეიძლება იყოს კრიტიკული კომპონენტი, რომლის დაკარგვაც მას საბრძოლო შესაძლებლობებს წაართმევს. ჯავშანტექნიკის მძიმე წონის გამო მთელი გემის დაჯავშნა შეუძლებელია.

ამას გარდა, საზღვაო ბრძოლის დისტანცია დაახლოებით ათჯერ არის გაზრდილი, შესაბამისად, დაცვა საჭიროა გემთსაწინააღმდეგო რაკეტებისგან.

რამდენად დაუცველია თანამედროვე გემი, ჩანს ამერიკულ გამანადგურებელ კოულზე თავდასხმაში. 2000 წლის 12 ოქტომბერს იემენის ადენის პორტში საწვავის შევსებისას მას 225 კილოგრამი ასაფეთქებელი ნივთიერებით სავსე მოტორიანი ნავი დაეჯახა.

აფეთქების შედეგად 17 მეზღვაური დაიღუპა და 40 დაშავდა, თავად გემი კი სერიოზულად დაზიანდა, მის რეაბილიტაციას მრავალი თვე დასჭირდა. წყარო

მოამზადა ეკა დარჩიაშვილმა