"ჩვენ როცა ნიკა მელია ავირჩიეთ, პარტიის წინაშე იდგა სულ სხვა ამოცანები, ახლა დგას სულ სხვა ამოცანები" - დავით კირკიტაძე
ჩემი ინფორმაციით, პარტიაში ყველა დონის არჩევნების გამართვის წინააღმდეგი არავინ არის - ამაზე პარტიაში მსჯელობა მიდიოდა,- ამის შესახებ ჟურნალისტებთან "ნაციონალური მოძრაობის" დეპუტატმა, დავით კირკიტაძემ განაცხადა, რითაც გამოეხმაურა მისი თანაგუნდელის, ირაკლი ნადირაძის ბრიფინგს, რომელიც პარტიაში სხვადასხვა თანამდებობაზე, მათ შორის თავმჯდომარის პოსტზე, შიდა არჩევნების ჩატარების ინიციატივით გამოდის.
კითხვაზე, ხომ არ დგას ამ ინიციატივის უკან დავით კეზერაშვილი, რადგან იყო საუბრები კეზერაშვილისა და ნიკა მელიას დაპირისპირების თაობაზე, კირკიტაძე აცხადებს, რომ მათი განცხადების უკან ვერაფერს ხედავს, გარდა "ნაციონალური მოძრაობის" გაძლიერებისა.
"ყველა ადამიანს, განსაკუთრებით დღეს ვინც იქ იდგა, ვისაც "ნაციონალური მოძრაობის" გაძლიერება უნდა, პატივისცემით ვეპყრობი და არავის ვაკადრებ, ვუთხრა, რომ მისი გულწრფელი ინტერესის უკან ესა თუ ის ადამიანი იმალება. გულწრფელად, მე ვერ დავინახე მათ უკან ვერაფერი გარდა გულწრფელი სურვილისა, რომ "ნაციონალური მოძრაობა" გაძლიერდეს, ნებისმიერ ადამიანს შეუძლია ყველას უკან ვიღაც დაინახოს,"- განაცხადა კირკიტაძემ.
კითხვაზე, მისი მხარდაჭერა რამდენად ექნება ნიკა მელიას, თუკი ის თავის კანდიდატურას კვლავ დააყენებს, კირკიტაძე პასუხობს, რომ მისი მხარდაჭერა ექნება ყველა იმ ადამიანს, "ვინც "ნაციონალური მოძრაობის" გაძლიერების, გაერთიანების რეალურ გეგმას შესთავაზებს."
"ჩვენ როცა ნიკა მელია ავირჩიეთ, პარტიის წინაშე იდგა სულ სხვა ამოცანები, ახლა დგას სულ სხვა ამოცანები. ამ მიმართულებით გვჭირდება ნაბიჯები გადავდგათ. სიამოვნებით მოვისმენ ყველა კანდიდატის მოსაზრებას. მე ნამდვილად არ ვიქნები თავმჯდომარის კანდიდატი. მხარს დავუჭერ იმას, ვისაც ექნება კარგი გეგმა. ამ თემაზე რომ პარტიაში ყველა დონის ელექტრონული არჩევნები გამართულიყო, მსჯელობა მიდიოდა, უბრალოდ, დღეს ჩვენმა თანამებრძოლებმა, ახალგაზრდებმა, საინიციატივო ჯგუფმა ეს გააჟღერა საჯაროდ, ჩემი ინფორმაციით, ამის წინააღმდეგი არავინ არის. როგორ შეიძლება იყო წინააღმდეგი სხვადასხვა თანამდებობაზე ფართო ჩართულობით არჩევის. როგორ შეიძლება წინააღმდეგი იყო, რომ თანამებრძოლებს, რომლის იმედიც უნდა გქონდეს პოლიტიკურ ბრძოლაში, შეუზღუდო მონაწილეობა პარტიულ ცხოვრებაში. დღეს ამის საშუალებას გვაძლევს თანამედროვე ტექნოლოგიები, ვითხოვთ, რომ ქვეყანაში ჩატარდეს ელექტრონული არჩევნები და რატომ უნდა ვიყოთ პარტიაში ფართო ჩართულობით ელექტრონულად იყვნენ ადამიანები არჩეული,"- განაცხადა კირკიტაძემ.