ქანიე უესტის "30-დღიანი წმენდა" - რეპერი უარს ამბობს საუბარზე, სექსზე, ფილმების ნახვასა და ალკოჰოლზე
ქანიე უესტმა კიდევ ერთი უცნაური გადაწყვეტილება მიიღო. რეპერი 30 დღის განმავლობაში უარს ამბობს ლაპარაკზე, სექსზე, ფილმების ყურებასა და ალკოჰოლზე და როგორც ამბობს, "სიტყვიერ მარხვას" იწყებს.
45 წლის ქანიემ Twitter-ზე გამოაქვეყნა ინფორმაცია, რომ ის "30-დღიანი წმენდის" ფარგლებში, არავისთან ისაუბრებს.
- "მე ვიწყებ 30-დღიან წმენდას, ეს სიტყვიერი მარხვაა. არა საუბარს, არა ალკოჰოლს, არა კინოს, არანაირი სქესობრივი კავშირი. ღმერთს ვადიდებთ. ამინ. მაგრამ ჩემი Twitter მაინც ანთია...", - დაწერა რეპერმა.
ბოლო პერიოდში ქანიე უესტი სკანდალებში ხშირად ეხვევა. გასულ თვეში მას "ტვიტერის" ანგარიში გააუქმეს, რადგან ანტისემიტური შინაარსის განცხადება გამოაქვეყნა. მაგრამ Twitter-ის ახალმა მფლობელმა ილონ მასკმა გასულ კვირას ვარსკვლავის ანგარიში აღადგინა.
ქანიეს ყოფილმა მეუღლემ კიმ კარდაშიანმა უკმაყოფილება გამოხატა უესტის ანტისემიტური მესიჯების მიმართ. კიმის თქმით, სიძულვილის ენა "არასდროს არის კარგი", ან "მისატევებელი."
"მე მხარს ვუჭერ ებრაულ საზოგადოებას და მოვუწოდებ ქანიეს, დაუყოვნებლივ შეწყვიტოს მათ მიმართ საშინელი ძალადობა და სიძულვილის ენით საუბარი“, - დაწერა კიმმა "ინსტაგრამზე“.
სკანდალების შემდეგ, უკვე ორი კვირაა, რაც რეპერი მილიარდერობას დაემშვიდობა. მასთან თითქმის ყველა კომპანიამ შეაჩერა კონტრაქტი. შედეგად კი უკვე მილიარდერის სტატუსი დაკარგა. მილიარდერთა სიაში ის მას შემდეგ აღარ არის, რაც სპორტულმა კომპანია Adidas-მა რეპერთან კონტრაქტი გაწყვიტა. ქანიე და Adidas-ი 2013 წლიდან თანამშრომლობდნენ.
გერმანულ კომპანიასთან გარიგებით მიღებული სარგებელი 1,5 მილიარდ დოლარს შეადგენდა. ახლა კი, Adidas-ის გარეშე, Forbes-ის მიხედვით, ქანიეს ქონება 400 მილიონ დოლარად არის შეფასებული.
ქანიესთან თანამშრომლობაზე უარი თქვეს Vogue-მ, Gap-მა და Balenciaga-მ.. 45 წლის უესტი თვის დასაწყისში Drink Champs-ის პოდკასტში სტუმრობისას ამტკიცებდა, რომ შეუძლია თქვას ნებისმიერი რამ, მათ შორის, გააკეთოს ანტისემიტური განცხადებები, მაგრამ მასთან კონტრაქტს არავინ გაწყვეტს.