ჩრდილოეთ ოსეთიდან მობილიზებულმა ოთხმა მთვრალმა პირმა ჯერ ძროხები დახოცა, ხოლო შემდეგ რუსი სამხედრო დაჭრა - ჩხუბი ოკუპირებულ ვასილიევკაში
ჩრდილოეთ ოსეთიდან მობილიზებულმა ოთხმა მთვრალმა სამხედრომ, რუსეთის მიერ ოკუპირებულ უკრაინის ქალაქ ვასილიევკაში, ზაპოროჟიეს რეგიონში, 13 ძროხა დაკლა, გაქცევის დროს კი მათ რუსი სამხედრო მოსამსახურე დაჭრეს.
"ტელეგრამ" არხ BAZA-ს ინფორმაციით, მობილიზებულებმა ჯერ ფერმაში ძროხები დახოცეს, მისი მფლობელი გააძევეს, ხოლო რუს ჯარისკაცს სცემეს.
ამის შემდეგ ფერმაში მომუშავე ერთ-ერთი ადამიანის ავტომობილი მოიპარეს, თუმცა საგუშაგოზე მათი შეჩერება სცადეს, რა დროსაც "მობილიზებულებმა" ცეცხლი გახსნეს და რუსი სერჟანტი დაჭრეს.
საბოლოოდ, მათი დაკავება შეძლეს. გავრცელებული ინფორმაციით, ისინი მთვრალები იყვნენ. მომხდარის შესახებ ინფორმაცია დაადასტურა ჩრდილოეთ ოსეთის ხელმძღვანელმა, სერგეი მენიალომ.
"მრცხვენია ამ ხალხის გამო და არაფრის თქმა არ მსურს“, - დაწერა მან "ტელეგრამის" არხზე. მანვე პირობა დადო, რომ "დამნაშავეები დაისჯებიან.“ როგორც მენიალომ აღნიშნა, მობილიზაციის შემდეგ, ამ ადამიანებზე კონკრეტული ფორმირებების მეთაურებს ეკისრებოდათ პასუხისმგებლობა.