ბათუმის დრამატულმა თეატრმა თამარ მაყაშვილი, მის მიერ გაკეთებული დისკრიმინაციული განცხადების გამო, სპექტაკლებიდან მოხსნა
ბათუმის ილია ჭავჭავაძის სახელობის პროფესიული სახელმწიფო დრამატულმა თეატრმა მსახიობი თამარ მაყაშვილი მის მიერ გაკეთებული დისკრიმინაციული განცხადების გამო რეპერტუარიდან მოხსნა.
თეატრის მიერ გავრცელებულ განცხადებაში ნათქვამია, რომ თეატრი ემიჯნება დასის წევრის თამარ მაყაშვილის მიერ გამოთქმულ შეურაცხმყოფელი შინაარსის გამონათქვამს.
"ბათუმის დრამატული თეატრისთვის, რომელიც რეგიონში წარმოადგენს ხანგრძლივი ისტორიისა და ტრადიციის მქონე კულტურის კერას, რომლის მიზანია თეატრალური მხატვრული ნაწარმოების შექმნა და მათი მეშვეობით ეროვნული თვითშეგნების გამტკიცება, ტრადიციების პატივისცემა, ზოგადსაკაცობრიო ფასეულობათა დამკვიდრება და განვითარება, მიუღებელია მსგავსი შინაარსის შემცველი გამონათქვამები. აღნიშნულიდან გამომდინარე თეატრის სამხატვრო ხელმძღვანელის გადაწყვეტილებით მსახიობი თამარ მაყაშვილი მოიხსნა მიმდინარე რეპერტუარიდან და მის მიმართ გატარდა შესაბამისი ზომები", - ნათქვამია თეატრის განცხადებაში.
ცნობისთვის, "იმედზე“ ერთ-ერთ გადაცემაში თამარ მაყაშვილმა "ხულელი ბავშვი“ დამაკნინებელ კონტექსტში მოიხსენია, რის გამოც მან მოგვიანებით ბოდიში მოიხადა.
"მე მაპატიეთ, თუკი ვინმეს უნებურად გაწყენინეთ! ნამდვილად არ მახასიათებს! ძალიან მაწუხებს არაწორად ნათქვამი და გაგებული! ღმერთი-რჯული, არც გამივლია გულში მსგავსი რამ!.. არასწორ სიტყვათა თანწყობამ გამოიწვია ეს. მეც უამრავი ბავშვის პატრონი ვარ და ყველა კუთხის ბავშვებს ვუდგავარ გვერდში უანგაროდ. გულწრფელად ვნანობ! მეტი არ ვიცი რა გავაკეთო? მე მაპატიეთ! აღარ გავიმართლებ თავს, რადგან ჩემი ჩანაწერი-მიმართვა გულწრფელი არ გგონიათ! შევცდი ბატონო! ვაღიარებ!
პ.ს. მაინც ვიტყვი, რომ მიყვარხართ! ასეა ეს! არ მაქვს უნარი, შევწყვიტო ადამიანების და მითუმეტეს ბავშვებისადმი სიყვარული! მიყვარს და მეყვარება ყველა ერის, რჯულის და რასის!" - დაწერა მაყაშვილმა სოციალურ ქსელში.
ასევე იხილეთ: