"ვინც ხმა ამოიღო, ყველა გაათავისუფლა, მე არ გავჩუმდი, დანარჩენებს ეშინიათ" - რას ამბობს ექთანი, რომელმაც ლევან რატიანს სასამართლო მოუგო და რას პასუხობს კლინიკის გენდირექტორი?
პირველი საუნივერსიტეტო კლინიკის ხელმძღვანელი ლევან რატიანი კიდევ ერთ სკანდალში გაეხვა. ამავე კლინიკის ექთანმა, ნინო კვაჭაძემ რატიანს საქალაქო სასამართლოში დავა მოუგო. როგორც კვაჭაძე ამბობს, ის ამ კლინიკაში 30 წელია, რაც მუშაობს და ამ წლების განმავლობაში, შენიშვნაც კი არ მიუღია. ამბობს, რომ დაკისრებულ მოვალეობას ყოველთვის პირნათლად ასრულებდა. მასა და რატიანს შორის ურთიერთობა ბოლო პერიოდში განსაკუთრებულად დაიძაბა. როგორც ექთანი ამბობს, 2022 წლის ივნისში, კლინიკის გენერალურმა დირექტორმა ის სამსახურიდან უკანონოდ გაათავისუფლა, რადგან გაზრდილ ხელფასს და შრომის უკეთეს პირობებს ითხოვდა. მისივე თქმით, კლინიკაში სანიტარულ - ჰიგიენური ნორმები ყოველდღიურად ირღვეოდა, რასაც ექთანი მუდმივად აპროტესტებდა.
"ვითხოვდი ხელფასის მომატებას, რადგან ექთნის ხელფასი შეადგენს 400-450 ლარს. ამ ხელფასით ცხოვრება შეუძლებელია, მითუმეტეს, რომ ჩვენ ამ ხელფასით ოჯახებს ვარჩენთ. კარდიო-ინტენსიურ განყოფილებაში ვმუშაობ. ერთ ექთანს უნდა ჰყავდეს 3-4 პაციენტი, ჩვენ კი ვემსახურებით 14- მდე პაციენტს. ხელფასის მომატებასთან ერთად ვითხოვ პირობების გაუმჯობესებას. არ შეიძლება კარდიო-ინტენსიურში მონიტორი გქონდეს გაფუჭებული. არ შეიძლება, რომ კარდიოლოგიურში კარდიოგრაფი იყოს გაფუჭებული. არ შეიძლება ნიღაბი არ ჰქონდეს ექთანს. " - ამბობს ნინო კვაჭაძე.
ექთნის განცხადებით, რატიანმა მასზე ფსიქოლოგიურად იძალადა და აიძულებდა ეღიარებინა ის, რაც მას არ ჩაუდენია.
მისივე თქმით, რატიანის მხრიდან ადგილი ჰქონდა ყვირილს, მაგიდაზე ხელების ბრახუნსა და ფსიქოლოგიურ წნეხს. ამ ინციდენტიდან 3 დღის შემდეგ, რატიანმა ნინო კვაჭაძე სამსახურიდან გაათავისუფლა.
"ერთ-ერთ მორიგეობაზე ვიყავი ინტენსიურ განყოფილებაში პაციენტთან, ვაწარმოებდი მონიტორინგს, შემოვიდა რატიანი ღამით და მეუბნება: დაწერე ახსნა-განმარტება, რომ შენ იწექი პაციენტის გვერდით, მოსასვენებლადო. ეს იყო აბსურდი, ამას როგორ დავწერდი?! ყველა ექთანს აქვს მოსასვენებლი ოთახი, პაციენტის გვერდით როგორ დავწვებოდი?! მას უნდოდა ეს დამეწერა და ამის საფუძველზე სამსახურიდან გავეთავისუფლებინე. ამ ინციდენტიდან 3 დღის შემდეგ ისევ გავედი მეორიგეობაზე და სამსახურიდან გამათავისუფლა. ვინც ხმა ამოიღო უსამართლობის წინააღმდეგ, ყველა გაათავისუფლა, მე არ გავჩუმდი, დანარჩენებს ეშინიათ. ხალხს ეუბნებიან, - თუ არ მოგწონს, წადი, კარი ღიააო. მე არ შევეგუე უსამართლობას. სასამართლოს პირველი ინსტანცია მოვიგე თავიდან ბოლომდე. თუკი გაასაჩივრებენ სააპელაციოში და უზენაესში, იმასაც მოვიგებ. იმიტომ, რომ მართალი ვარ“, - განაცხდა ნინო კვაჭაძემ.
საქალაქო სასამართლოს გადაწყვეტილებით, პირველი საუნივერსიტეტო კლინიკა ვალდებულია, ექთანი სამსახურში აღადგინოს და განაცდური აუნაზღაუროს.
კლინიკის გენერალური დირექტორი ექთნის ბრალდებებს უარყოფს და ამბობს, რომ ყველაფერი ტყუილია.
კლინიკის გავრცელებულ განცხადებაში ვკითხულობთ, რომ ექთანი ნინო კვაჭაძე პირველი საუნივერსიტეტო კლინიკიდან გათავისუფლებულია უხეში დარღვევის გამო, რაც გამოიხატა მისი მხრიდან პაციენტების უყურადღებოდ მიტოვებაში. ეს არ იყო პირველი დისციპლინარული უხეში გადაცდომა, რომელიც მისი კლინიკიდან გათავისუფლების საფუძველი გახდა.
"ნინო კვაჭაძე პაციენტებისადმი გამოირჩეოდა უხეში, უტაქტო და გულრგილი დამოკიდებულებით. იგი დროულად არ ასრულებდა ექიმის მითითებებს პაციენტის კვების, ჰიგიენური ნორმებისა და სანიტარული ნორმების დაცვის შესახებ, რაც მთავარია, არ ასრულებდა ექიმის მითითებას და სასიცოცხლო მედიკამენტების მიცემას პაციენტისთვის. რაც ცალსახად მოქმედებს პაციენტის ჯანმრთელობაზე და არშესრულებამ შესაძლოა დააყენოს პაციენტის მდგომარეობის დამძიმება და შესაძლო სიკვდილიც კი. ასევე, უნდა აღინიშნოს, რომ ექთანი ნინო კვაჭაძის მომსახურებით უკმაყოფილო იყო არაერთი პაციენტი, მათ შორის მოქალაქე ლ. ტ.-ძე, რომელიც აღნიშნავს, რომ ექთანი მისდამი გამოირჩეოდა უხეში დამოკიდებულებით, ესაუბრებოდა ხმამაღალი ტონით, დროულად არ გაუკეთა შესაბამისი კვლევა და მედიკამენტი. ასევე, უყურადღებობა გამოიჩინა პაციენტ ვ. მ.- ის მიმართ, რამაც გამოიწვია პაციენტის ჯანმრთელობის მდგომარეობის დამძიმება... ექთანი ვალდებულია მკურნალ ექიმს ან მისი არყოფნის შემთხვევაში მორიგე ექიმს დაუყოვნებლივ მოახსენოს ინფორმაცია ავადმყოფთა მდგომარეობის გაუარესების შესახებ. აღსანიშნავია ორივე პაციენტის შემთხვევაში ის, რომ ექთან ნინო კვაჭაძეს მორიგეობის დროს ეძინა. კლინიკაში დამტკიცებული უფლება-მოვალებების ბრძანების შესაბამისად ექთანს აკრძალული აქვს პაციენტებთან ერთად ერთ პალატაში ძილი, თანაც ლაპარაკია ინტენსიური თერაპიის პალატის პეციენტებზე", - ნათქვამია კლინიკის გავრცელებულ განცხადებაში.
იხილეთ ასევე:
ავტორი: თიკო გურაშვილი