საქართველო ბიომეკობრეობის საერთაშორისო სკანდალში ეხვევა? - ვინ და რატომ ყიდულობს ბაობაბის ხეებს კენიაში: რას წერს The Guardian-ი?
კენიაში ადგილობრივი გარემოსდამცველები საქართველოში ბაობაბის გაყიდვისა და ექსპორტის აკრძალვას ითხოვენ. ამის შესახებ ბრიტანული გამოცემა the guardian-ი წერს.
გამოცემის ინფორმაციით, კომპანიას, რომელსაც გიორგი გვასალია ხელმძღვანელობს, ბრალს სდებენ ბიომეკობრეობაში. მათი ცნობით, ის ყიდულობს ხეებს, შემდეგ თხრის და გადააქვს საქართველოს ბოტანიკურ ბაღებში. საქართველოში ბაობაბები მიაქვთ ქალაქ კილიფიდან და მათ ადგილობრივი ფერმერებისგან ყიდულობენ.
ადგილობრივების თქმით, კომპანიამ ბაობაბების ძებნა 2019 წელს დაიწყო. კილიფში დრონებით ეძებდნენ გარკვეული სტანდარტის ხეებს. თითოელ ბაობაბში ფერმერებს 100 000-დან 300 000 კენიურ შილინგამდე სთავაზობენ, რაც დაახლოებით, 820-დან 2000 დოლარამდეა. "გარდიანის" ცნობით, სულ 8 ბაობაბი იყიდეს.
ექსპერტები მიიჩნევენ, რომ ასეთმა წამოწყებამ შესაძლოა, უარყოფითად იმოქმედოს კენიის ეკოლოგიაზე, რადგან იქ გვალვას ებრძვიან და ცდილობენ აღადგინონ ტყის დაკარგული საფარი.
"ეს მეკობრეობაა და მე ვერ ვხედავ გამართლებას მსოფლიოს ერთი რომელიმე კუთხიდან მეორეში ხეების გადატანაში", - ამბობს აფრიკული ბაობაბების საკითხზე შექმნილი ალიანსის თავმჯდომარე, გუს ლე ბრეტონი.
თვითონ გვასალიას თქმით, კენიაში ბაობაბებზე დაკვირვება და სასურველი ბაობაბების შერჩევა მას შემდეგ დაიწყო, რაც შეიტყო, რომ იქ ამ ხეებს სხვადასხვა მიზნებისთვის ისედაც ჭრიდნენ.
- "ჩემამდე ჭრიდნენ ხეებს იმიტომ არ ამ ადგილებში მარცვლეული დაეთესათ. ცუდს ვერაფერს ვხედავ იმაში, რომ მოვუარო ხეებს, რომელსაც ისინი ისედაც ჭრიან. ტრაგედიაა ხეების ტყუილად განადგურება“, - ციტირებს "გარდიანი“ გვასალიას სიტყვებს.
გასულ თვეში კენიელმა უფლებადამცველებმა და სატყეო სამსახურის წარმომადგენლებმა პროკურატურაში საჩივარი შეიტანეს და გვასალიას კომპანიას უჩივლეს. აღნიშნეს, რომ კომპანიას არ გააჩნია საჭირო ლიცენზიები, მათ შორის არ აქვს ხეების ტრანსპორტირების ნებართვა.
სასამართლო პროცესი შეჩერდა, რადგანაც ფირმამ ყველა საბუთი მიიღო, მომჩივნებმა კი აღიარეს, რომ ახლა ისინი უძლურნი არიან, რადგანაც ბაობაბი, რომელიც გვასალიამ იყიდა, კერძო მიწაზე იზრდებოდა.
The Guardian აღნიშნავს, რომ ბაობაბების ამოძირკვა ადვილი საქმე არ არის, ხეებს უზარბაზარი ფესვები და უზარმაზარი ტოტები აქვთ. გარდა ამისა, ამ ხეების გემებზე ჩასატვირთად აშენებენ დროებით გზებსა და ბურჯებს.
ხეები გიგნტურ მეტალის სათავსოებში, გალიებშია მოთავსებული. ჟურნალისტები ვარაუდობენ, რომ ამ ყველაფრის გაკეთება მილიონობით დოლარი ჯდება. "გარდიანი" არაფერს წერს იმის შესახებ, თუ ვინ დგას გიორგი გვასალიას მიღმა.
ცნობისთვის, 2018 წელს ბრიტანულმა გაზეთმა, Evening Standard-მა გაავრცელა ინფორმაცია, რომ ივანიშვილმა აღმოსავლეთ აფრიკაში ოთხი ბაობაბი იყიდა. კენიის პორტიდან საქართველოში 250 ტონაზე მეტი წონის ხეების გადასატანად მილიარდერს 850 000 დოლარის გადახდა მოუწია.
წარსულში პარკისთვის გიგანტურ ხეებს საქართველოშიც ეძებდნენ და საზოგადოებას არაერთი სიურეალისტური კადრი უნახავს გიგანტური ხეების ერთი ადგილიდან მეორეზე გადატანის.