"მეუბნებიან, უბერებელი ხარო... გამოგიტყდებით და ეს არ მომწონს" - 28 წელი უწყვეტად პოდიუმზე: როგორ ინარჩუნებს კრისტი ყიფშიძე ფორმას და მიმართავს თუ არა პლასტიკურ ქირურგიას?

28 წელი პოდიუმზე, იმავე ემოციით, განწყობით, როგორც პირველ დღეს, საქმის ისეთივე სიყვარულით და რაც მთავარია, უცვლელ ფორმაში, ალბათ იშვიათია. კრისტი ყიფშიძისთვის, მოდელობა მოწოდებაა. ბედნიერია, რომ ამ სფეროში წლების წინ აღმოჩნდა, რაზეც დღეს ამბობს, რომ შემთხვევით მართლაც არაფერი ხდება...

როგორ ინარჩუნებს ფორმას, აქვს თუ არა ამისთვის რაიმე ფორმულა და რას ურჩევს ქალბატონებს, ამას მისი ინტერვიუდან შეიტყობთ.

- 4 ნოემბერს 28 წელი მისრულდება, რაც მოდელი ვარ. ყოველ წელს ეს დღეს ჩემთვის მნიშვნელოვანია და ვცდილობ, განსხვავებული იყოს ხოლმე... ჩემთვის თავისებურად აღვნიშნავ... 1994 წელი იყო, ურთულესი დრო, არსად არაფერი არ ხდებოდა. იყო მხოლოდ ერთადერთი განსხვავებული სივრცე - სასტუმრო „მეტეხი“ და სწორედ იქ მაკა ნაცვლიშვილის ჩვენება შედგა, სადაც ძალიან ცნობილ გოგოებთან ერთად, - ლიკა ქავჟარაძე, დინი ვირსალაძე, ნინო სალუქვაძე („მის საქართველო“) მეც გამოვედი... მაშინ მივხვდი, რომ ეს ის სფერო და საქმე იყო, რომელიც არასდროს მომბეზრდებოდა... საერთოდ, როცა რამეს აკეთებ, ნებისმიერ პროფესიაში ასეა, - უნდა გიყვარდეს, გულით აკეთო და შენი მოწოდება უნდა იყოს. ასე ადამიანს ყოველთვის კარგი შედეგები აქვს. საერთოდ, თვითკრიტიკული ვარ, არ მიყვარს საკუთარ თავზე ლაპარაკი, მაგრამ ბოლო დროს სხვანაირად დავიწყე ჩემი თავის შეფასება და დაფასება. რადგან 28 წელი ამ საქმეში ვარ, ე.ი. ეს ჩემი მოწოდებაა და საქმის ძალიან დიდი სიყვარული.

- მოდელები, რომლებიც შენთან ერთად წლების განმავლობაში პოდიუმზე იდგნენ, ამ საქმეს კარგა ხანია ჩამოშორდნენ. რის ხარჯზე ახერხებ ფორმის შენარჩუნებას და ისევ მოდელობას. ამის რაიმე ფორმულა გაქვს?

- არანაირი ფორმულა თუ საიდუმლო არ მაქვს. ალბათ მაინც გენეტიკაა. ჩემი დაკვირვებით, გენეტიკას მნიშვნელობა აქვს, თუნდაც როგორ მოგყვება კანის სტრუქტურა. ის, რაც გენეტიკურად გადმომეცა, ჩემი საჩუქარია, მაგრამ რაც არ უნდა კარგი გენეტიკა იყოს, ამ ყველაფერს მოვლა სჭირდება. რომ გითხრათ, ბევრი შრომა მიწევს-მეთქი, არა. მარტივად არის ყველაფერი. პირველ რიგში, მნიშვნელოვანია ჯანსაღი კვება. ყველაფერს არ მივირთმევ, ზოგ პროდუქტზე ორგანიზმს აუტანლობაც აქვს, ძირითადად ჯანსაღად ვიკვებები. მერე ძილს ვანიჭებ დიდი მნიშვნელობას. ასე თუ ისე, თუ სადმე რაიმე საღამოზე არ ვარ, ვცდილობ, სახლშიც რაც გასაკეთებელი მაქვს, დროულად დავასრულო და 11 საათზე წამოვწვე და სხეული დავასვენო. მაგ დროისთვის თუ დაძინებას შევძლებ, მთლად უკეთესი. ასევე მნიშვნელოვანია ფსიქოლოგიური განწყობა. ოღონდ, არა ხელოვნურად შექმნილი, ეს ბუნებრივი უნდა იყოს.

ბოლო დროს ხშირად გვესმის ფსიქოლოგების საუბრები იმაზე, რომ შევიყვაროთ საკუთარი თავი. ბევრი ამას ვერ იგებს რას ნიშნავს, ზოგს რაღაც ეგოისტური მომენტები ჰგონია. არა, უნდა გრძნობდე, რომ შენი თავი გიყვარს, დიდ პატივს სცემ. ამას რომ შეიგრძნობ, მერე ყველაფერი სხვანაირად მიდის... სარკეში რომ იყურები, ვიღაცისთვის კი არ უნდა ჩაიხედო, შენთვის, ჯერ შენთვის და მერე სხივისთვის. მერე გარემოც სხვანაირად შემოგხედავს. ასეთ დროს სხვა ენერგიები კურსირებს და სხვანაირად ცდი შენს თავდაჯერებულობას, იმას, რომ შენს თავთან კარგად ხარ. ამ ყველაფერს კიდევ დავამატებდი ფეხით სიარულს, თუმცა სპორტდარბაზების მოყვარული არ ვარ. რაღაც ვარჯიშებს სახლში ვაკეთებ. ასევე აუცილებელი არ არის, სადმე კლუბში ან დარბაზში იცეკვო, ცეკვა სახლშიც შეგვიძლია. ეს გვიცვლის განწყობას და ძალიან სასიამოვნო პროცესია. მე კარგ ხასიათზე მაყენებს, ტონუსშიც მოვდივარ, სისხლიც აქტიურად მოძრაობს და კუნთებიც.

- კი ფეხით სიარული ჯანმრთელობისთვის მართლაც კარგია...

- ფეხით სიარული დიდ მანძილებზეც შემიძლია, უბრალოდ ამისთვის დროა საჭირო. თუ სადმე ფანჯარა გამომიჩნდა, მას აუცილებლად ფეხით ვავსებ. მირჩევნია, დანიშნულების ადგილზე ფეხით წავიდე, ვიდრე ვთქვათ, მანქანა გავაჩერო.

- ბევრი ქალბატონი გასაახალგაზრდავებლად პლასტიკურ ქირურგიას მიმართავს. გეტყობა, რომ ამისთვის ჯერ არ მიგიმართავს. ისე რა მოსაზრება გაქვს ამ ყველაფერზე?

- პლასტიკურ ქირურგიას არ მივმართავ, მაგრამ ამის მიმართ ასეთი დამოკიდებულება მაქვს - ვფიქრობ, არც დამჭირდება ეს. ბევრი წყალი, სწორი კვება, გენეტიკა თავის კვალს ტოვებს. ასევე სახის ნიღბებიც, რაც კარგია, მაგრამ ეს მაინც დროებითია, მხოლოდ ზედაპირული დატენიანებაა. ამიტომ, ყველას ვურჩევ, რაღაცნაირად ამისთვის სახსრები გამოყონ, გაიკეთონ ბიორევიტალიზაცია და ამით მინიმალური კომფორტი შეიქმნან. მე დავიწყე ეს პროცედურა. კანქვეშ ბევრი ვიტამინისა და გარკვეული მჟავების შეშვება ხდება. ეს კანს კვებავს და ნაოჭებისგან იცავს. და 6 თვე არაფერი გჭირდება. დანარჩენს სხვა პროცედურებს, რომ რაიმე რადიკალური ცვლილებები შევიტანო გარეგნობაში, როგორც ვთქვი, არ მივმართავ, იმიტომ კი არა, რომ ცუდია, მიმაჩნია, რომ არ მჭირდება. თმის ფერს ადრეულ წლებში ხშირად ვიცვლიდი, წითლადაც მქონდა შეღებილი, ქერადაც ვცადე, მქონოდა, მაინტერესებდა. უკვე წლებია, ერთი და იმავე, ჩემი ბუნებრივი თმის ფერზე ვიღებავ და ისევე გამოვიყურები, როგორც 16-17 წლისა რომ ვიყავი და მოდელობა დავიწყე.

- ე.ი. იმ ძველ ფერს და იმ იერ-სახეს დაუბრუნდი...

- კი. გუშინ გოგო შემხვდა, რომელიც 10 წელი არ მყავდა ნანახი, - ისევ ისე გამოიყურებიო. ხშირად მეუბნებიან ასეთ სიტყვებს. ეს დიდ კომპლიმენტია. კომენტარებში ამასაც მიწერენ - უბერებელი ხარ. გამოგიტყდებით და ეს კი არ მომწონს. 45 წლის ადამიანი ბებერი რანაირად უნდა დაუძახო?!. ამიტომ, უხეშად და არასასიამოვნოდ ჟღერს. მესმის, რომ უნდათ კომპლიმენტი გამიკეთონ, მაგრამ უხეშად გამოსდით და ყურს ჭრის...

- რა რჩევებს მისცემ ჩვენს მკითხველ ქალბატონებს?

- შეიყვარონ საკუთარი თავი, რადგან ასე იწყება ყველაფერი. ვიღაც იტყვის, რა დროს ეს არის, როცა მსოფლიოში ასეთი მძიმე პოლიტიკურ-ეკონომიკური სიტუაციააო?!. მაგრამ ჩვენ ხომ ადამიანები ვართ და თვითგადარჩენის უნარით დაბადებულები. თვითონ უნდა შევიქმნათ საკუთარი კომფორტი, პატარ სამყარო, რომელშიც თვითონ ვიქნებით თავის ბატონ-პატრონები. ამიტომ, ქალბატონებს ვურჩევ, საკუთარ თავზე და თავისთვის მეტი იმუშაონ. მოუარონ მას, შეცვალონ ცოტათი დამოკიდებულება.

არ მინდა, ჩემი სიტყვებით ვინმე გაღიზიანდეს, მაგრამ მაქსიმალურად ვცდილობ, სწორად გაიგონ, რასაც ვამბობ. როდესაც ამ ყველაფერში დიდი ენერგიას, ემოციას ჩადებ, სასურველი შედეგიც არ დააყოვნებს. როცა თავდაჯერებული ხარ, გიყვარს შენი თავი, საკუთარ თავს პატივს სცემ, ყველაფერი სხვანაირი იმპულსებით გიბრუნდება. ძალიან საინტერესო პროცესია. ეს ჩემი დაკვირვება კი არ არის, ამ თემაზე ბევრი სპეციალისტი, ფსიქოლოგი მუშაობს. თუმცა ეს საკითხები სიღრმისეულად მეც მაინტერესებს და რაღაც დონით მის შესწავლაში ჩართულიც ვარ. რაც დრო გადის, სულ ახალ-ახალ რაღაცებს ვსწავლობ და მიხარია ეს.

- სწავლა სიბერემდეო - როგორც იტყვიან...

- კი, საერთოდ, ასეთი კარგი გამონათქვამებიც რომ ამოვარჩიოთ, ჩამოვწეროთ ფურცელზე და ცხოვრების წესს დავუახლოოთ, კარგი იქნება. ისე, ჩემს როგორ გამოცდილებაზეც არ უნდა მოვყვე და ვისაუბრო და სხვებს აქედან რაიმე გავუზიარო, ის შედეგი არ ექნება, სანამ თვითონ არ გამოცდიან. ადამიანები ხომ ჩვენივე გამოცდილებით ვსწავლობთ. ამიტომ, კარგი გამოეცლება რაც შეიძლება ბევრი გვქონდეს.