"ხვალ მეტ ქალს რომ მოკლავენ, ამ მოსამართლის გადაწყვეტილების “დამსახურებაც” იქნება!" - რას წერს იდა ბახტურიძე ბასილაშვილის განაჩენზე?
უფლებადამცველი იდა ბახტურიძე ნიკოლოზ ბასილაშვილთან დაკავშირებით საქალაქო სასამართლოს გადაწყვეტილებას მწვავედ აკრიტიკებს:
"ხვალ მეტ ქალს რომ მოკლავენ, ამ მოსამართლის გადაწყვეტილების “დამსახურებაც” იქნება! სასამართლომ უარი უთხრა ქალებს დაცვაზე, ბედის ანაბარა და საკუთარი თავის იმედზე დატოვე ძალადობაგამოვლილი ქალები!" - წერს ბახტურიძე.
ფიზიკურ და ფსიქოლოგიურ ძალადობაში ბრალდებული ჩოგბურთელი, ნიკოლოზ ბასილაშვილი მოსამართლემ უდანაშაულოდ ცნო.
განაჩენის გამოცხადებას მხოლოდ ბრალდებული ნიკოლოზ ბასილაშვილი ესწრებოდა, სასამართლოზე არ გამოცხადებულა ნელი დოროყაშვილი.
ნიკოლოზ ბასილაშვილის წინააღმდეგ წარმოებულ საქმეზე 2 წლის განმავლობაში სასამართლოში არაერთი მტკიცებულება გამოიკვლიეს, მათ შორის, დაკითხნენ როგორც დაცვის მხარის, ასევე ბრალდების მხარის მოწმეები.
ცნობისთვის, საქართველოს პროკურატურამ ყოფილი მეუღლის მიმართ განხორციელებული ფიზიკური ძალადობის ფაქტზე ნიკოლოზ ბასილაშვილს ბრალდება საქართველოს სისხლის სამართლის კოდექსის 126-ე პრიმა მუხლის მე-2 ნაწილის „ბ“ ქვეპუნქტით წარუდგინა, რაც გულისხმობს ოჯახში ძალადობას არასრულწლოვნის თანდასწრებით. მოგვიანებით პროკურატურამ ბასილაშვილს ბრალდება დაუზუსტა და მას ძალადობის რამდენიმე ეპიზოდთან ერთად, ფსიქოლოგიურ ძალადობასაც ედავებოდნენ.
პროკურატურის განცხადებით, 2020 წლის 21 მაისს, თბილისში, ავჭალის დასახლებაში, ნიკოლოზ ბასილაშვილმა ურთიერთშელაპარაკების ნიადაგზე, ყოფილი მეუღლის ნელი დოროყაშვილის მიმართ ფიზიკური ძალადობა განახორციელა. სამართალდამცველებმა ნიკოლოზ ბასილაშვილი 2020 წლის 22 მაისს დააკავეს. სასამართლომ ბასილაშვილს აღკვეთის ღონისძიების სახით 100 000-ლარიანი გირაო შეუფარდა.
ნიკოლოზ ბასილაშვილს ფიზიკური ძალადობის 4 და ფსიქოლოგიური ძალადობის ერთ ეპიზოდზე ედება ბრალი. აღნიშნული ბრალდებები 1-დან 3-წლამდე პატიმრობას, ან საზოგადოებისათვის სასარგებლო შრომას ითვალისწინებს.
ნახეთ ასევე:
- "პირველ რიგში, შვილთან გაციებული ურთიერთობის აღდგენა მინდა დავიწყო" - ნიკოლოზ ბასილაშვილის პირველი კომენტარი განაჩენის შემდეგ
- ფოტო სასამართლოდან: ნიკოლოზ ბასილაშვილის რეაქცია, როდესაც მოსამართლემ უდანაშაულოდ ცნო
- "გაფორმდა ფემიციდი! ბოდიში ნელის არაკომპეტენტური და მიკერძოებული მოსამართლისთვის!" - დოროყაშვილის ადვოკატის პირველი კომენტარი განაჩენზე