"ევროკავშირის გადაწყვეტილებამ პასპორტებთან დაკავშირებით, შესაძლოა, გავლენა იქონიოს აფხაზეთში ევროპულ პროექტებზე" - ინალ არძინბას "მუქარა" და შეტევა არასამთავრობოებზე
ევროკავშირის მიერ რუსეთის მიერ ოკუპირებულ აფხაზეთში, "სამხრეთ ოსეთში" და უკრაინის ანექსირებულ რეგიონებში გაცემული რუსული პასპორტების შესაძლო აკრძალვამ შეიძლება გავლენა მოახდინოს აფხაზეთში საერთაშორისო და არასამთავრობო ორგანიზაციების მუშაობაზე, კერძოდ, ბრიუსელის მიერ დაფინანსებულ პროექტებზე. ამის შესახებ აფხაზეთის თვითგამოცხადებული რესპუბლიკის ე.წ. საგარეო საქმეთა მინისტრმა, ინალ არძინბამ განაცხადა.
აღსანიშნავია, რომ მანამდე მან არაერთხელ გააკრიტიკა აფხაზეთში მომუშავე საერთაშორისო და არასამთავრობო ორგანიზაციები. არძინბას მიაჩნია, რომ "უცხოური არასამთავრობოები ცდილობენ აფხაზეთის მაცხოვრებლების ჩართვას საქართველოს მთავრობის პროგრამის განხორციელებაში, რომლის საბოლოო მიზანია აფხაზეთში ქართული დროშის აღმართვა."
- მიმდინარე წლის მაისში აფხაზეთის ე.წ. საგარეო საქმეთა სამინისტრომ დახურა საერთაშორისო ორგანიზაცია "მოძრაობა შიმშილის წინააღმდეგ“ პროექტი სახელწოდებით - "ადგილობრივი მმართველობის გაუმჯობესება ინკლუზიური განვითარების მიდგომებით.“
აფხაზეთის ე.წ. ხელისუფლების განცხადებით, აღმოაჩინეს ფაქტები, რომლებიც მიუთითებდა გარკვეულ შეუსაბამობებზე პროექტის შესახებ მიწოდებულ მონაცემებსა და პროექტის ფარგლებში განხორციელებულ აქტივობებს შორის. აფხაზეთის ე.წ. ხელისუფლება უკმაყოფილო იყო პროექტის იმ ნაწილით, რომელშიც მონაწილეობდნენ ქართველი და აფხაზი ახალგაზრდები კულტურათაშორისი დიალოგის ჭრილში, რომლის ფარგლებშიც ტარდებოდა ერთობლივი ტრენინგები და სემინარები მოლდოვაში, ავსტრიასა და სომხეთში.
მიმდინარე წლის სექტემბერში აფხაზეთის ე.წ. საგარეო საქმეთა სამინისტრომ საფრანგეთის მოქალაქე ტიფენ ლუკასი პერსონა ნონ-გრატად გამოაცხადა, იმის გამო, რომ მათი თქმით, ლუკასი ეწეოდა დაზვერვის საქმიანობას და აგროვებდა მასალებს "რუსულ ბაზასთან ახლოს.“ ცნობისთვის ლუკასი პასუხისმგებელი იყო გაეროს სურსათისა და სოფლის მეურნეობის ორგანიზაციის პროექტზე, რომელიც მევენახეობის განვითარებას ეხებოდა.
- ცნობისთვის, 12 ოქტომბერს ევროკავშირის ელჩები შეთანხმდენენ, რომ არ აღიარონ რუსეთის მიერ ოკუპირებულ რეგიონებში, მათ შორის აფხაზეთსა და სამაჩაბლოში გაცემული რუსული პასპორტები და პირს, რომელსაც იქ აღებული რუსული პასპორტი ექნება, არ მისცენ შენგენის ზონაში შესვლის უფლება. გადაწყვეტილება ჯერ ოფიციალურად მიღებული არ არის, თუმცა ევროსაბჭოში აცხადებენ, რომ ამ თემაზე დისკუსია მალე დაიწყება.
წყარო: ekhokavkaza.com