"თუ მართლა მადლობის თქმა უნდა ამ კარგი ადამიანისთვის - შეხვდეს ჩუმად, ამ სიტუაციაში გაპიარება არის ამორალური" - ხატია დეკანოიძე თბილისის მერისა და დევი მეზურნიშვილის შეხვედრაზე
ვაკის პარკის მებაღეს, დევი მეზურნიშვილს, რომელმაც მოზარდები სიკვდილს გადაარჩინა, თბილისის მერი კახა კალაძე შეხვდა. შეხვედრის ამსახველი ფოტოები კი სოციალურ ქსელში მერიის პრესსამსახურმა გაავრცელა.
"ნაციონალური მოძრაობის" წარმომადგენელი, ხატია დეკანოიძე კალაძისა და მეზურნიშვილის ფოტოს ოფიციალურ გვერდზე აზიარებს და წერს:
"თუ მართლა შეხვედრა უნდა, მადლობის თქმა ამ კარგი ადამიანისთვის - შეხვდეს ჩუმად, ზედმეტი ფოტოების გარეშე.ამ სიტუაციაში გაპიარება არის ამორალური.
მორალური წნეხი ალბათ არასდროს შეაწუხებს ამ ადამიანს.არ ვიცი, კომენტარის გარეშე", - წერს დეკანოიძე.
ცნობისთვის, 13 ოქტომბერს, ვაკის პარკში, შადრევანში ბავშვები ბურთის ამოსატანად ჩავიდნენ, რა დროსაც მათ დენმა დაარტყა. ბავშვები კლინიკაში სასწრაფო დახმარების ბრიგადამ გადაიყვანა. ერთ-ერთი ბავშვის, 13 წლის გოგონას, მარიტა მეფარიშვილის მდგომარეობა თავიდანვე მძიმე იყო და ის ხეჩინაშვილის კლინიკაში გარდაიცვალა. მარიტა შადრევანში თავისი მეგობრების გადასარჩენად ჩავიდა.
მარიტას გარდა, დაშავებული იყო ორი ბავშვი, რომელთა გადარჩენაც მოხერხდა და ისინი უკვე კლინიკიდან გაწერეს. ბავშვები შადრევნიდან ვაკის პარკის მებაღემ, დავით მეზურნიშვილმა ამოიყვანა.