"ჩათვალეთ ოსკარია ეს საქართველოსთვის... კვარას ფოტოებს რომ ვაზიარებთ, მათ ფოტოებსაც სიამაყით უნდა ვაზიარებდეთ" - ალპინიზმში მთავარი ჯილდო ქართველებისაა

ქართული ალპინიზმის ისტორიაში პირველად, უმნიშვნელოვანესი ჯილდო "ოქროს წერაყინი" ქართველებს გადაეცემათ. ჯილდოს მფლობელები არჩილ ბადრიაშვილი, ბაქარ გელაშვილი და გიორგი ტეფნაძე გახდებიან. დაჯილდოების ცერემონია საფრანგეთში გაიმართება.

ინფორმაციას საქართველოს გაერთიანებული მთასვლელთა ფედერაცია აქვეყნებს.

"Piolets d'Or ანუ ოქროს წერაყინი, ანუ პირველად ქართული ალპინიზმის ისტორიაში! უმაღლესი ჯილდი და აღიარება ! უფრო ვრცლად და უფრო ქართულად მოგვიანებით დავწერთ", - ნათქვამია გამოქვეყნებულ ინფორმაციაში.

აღნიშნულ თემაზე სოციალურ ქსელში ნანიკო გრიგალაშვილი პოსტს აქვეყნებს:

"ისეთი დილა გათენდა, ისეთი ბედნიერი და ამაყი ვარ, არ ვიცი საქართველოში მარტო ფეხბურთი, რაგბი და აშ. რატომ არის მოდაში და რატომ არ ადევნებენ თვალყურს ალპინიზმს.

იცით რა მოხდა? აი მსოფლიო თასი რომ მოგვეგო, დიახ მსოფლიო თასი ჩვენ ქართველებს.აი ეს მსოფლიო ოქროს წერაყინი აიღეს ჩვენმა ალპინისტებმა არჩილ ბადრიაშვილმა, გიორგი ტეფნაძემ და ბაქარ გელაშვილმა.

კიდევ ერთხელ კარგად,რომ გაიგოთ კიდევ დაგიკონკრეტებთ, ჩათვალეთ ოსკარია ეს საქართველოსთვის.

წესით ახლა ყველა ეთერი ამას უნდა აშუქებდეს, წესით ყველა ქართველი კვარას ფოტოებს რომ ვაზიარებთ მათ ფოტოებსაც დიდი სიამაყით უნდა ვაზიარებდეთ. მსოფლიო ოქროს წერაყინი (ალპინიზმის ოსკარი) გადაეცათ არჩილ ბადრიაშვილს, გიორგი ტეფნაძეს და ბაქარ გელაშვილს პაკისტანში, აქამდე აუსვლელ მწვერვალ სარაგრარზე (Saraghrar Northwest 7,300m) უმაღლესი სირთულის მარშრუტის განხორციელებისთვის

დაჯილდოება იქნება საფრანგეთში", - წერს ნანიკო გრიგალაშვილი.