ჩვენ ევროპის ხალხი ვართ და ჩვენი ხმა მთელ ევროპაში უნდა ისმოდეს, ხმელთაშუა ზღვიდან ჩრდილოეთის ზღვამდე, ლისაბონიდან თბილისამდე და მის მიღმაც, - ამის შესახებ გერმანიის კანცლერმა ოლაფ შოლცმა ბერლინში ევროპელი სოციალისტების პარტიის კონგრესზე განაცხადა.
კანცლერის თქმით, ის ევროკავშირის გაფართოების ერთგულია.
„ის ფაქტი, რომ ევროკავშირი აღმოსავლეთით გაფართოებას განაგრძნობს - გამარჯვებაა ყოველი ჩვენგანისთვის”, - აღნიშნა გერმანიის კანცლერმა.
ამავროულად შოლცმა აღნიშნა, რომ კანდიდატმა სახელმწიფოებმა - უკრაინამ, მოლდოვამ და დასავლეთ ბალკანეთის ქვეყნებმა და, მომავალში, საქართველომ გაწევრიანების კრიტერიუმები უნდა დააკმაყოფილონ.
“ევროკავშირი, რომლის შემადგენლობაშიც 27,30, 36 სახელმწიფო შედის, შეძლებს კიდევ უფრო გააძლიეროს საკუთარი გავლენა მსოფლიოში”, - განაცხადა შოლცმა.
კანცლერის თქმით, შედარებით პატარა წევრი სახელმწიფოების წუხილი უგულვებელყოფილი არ უნდა იყოს.
“მომავალშიც ყოველი ქვეყნის წუხილები უნდა მოვისმინოთ, ყველაფერი დანარჩენი ევროპული იდეის ღალატი იქნება”, - აღნიშნა შოლცმა.
კანცლერის აზრით, საგარეო და საფინანსო საკითხებში ბლოკირებების თავიდან ასაცილებლად ევროკავშირი კონსენსუსის პრინციპიდან ხმათა უმრავლესობის პრინციპზე უნდა გადავიდეს.
