"არ გამიცვლია ჩემი სამშობლოს სალი კლდეები სხვის შემოთავაზებულ დაუჯერებელ სიმდიდრეზე!" - ლუკა კურტანიძე წერს, რომ ჭიდაობის ფედერაციის ვიცე-პრეზიდენტის თანამდებობა დატოვა
ლუკა კურტანიძემ საქართველოს ჭიდაობის ეროვნული ფედერაციის ვიცე-პრეზიდენტის თანამდებობა დატოვა. ვეტერანმა მოჭიდავემ ამის შესახებ სოციალურ ქსელში დაწერა...
ლუკა კურტანიძე:
"დღეს მივიღე გადაწყვეტილება პირადი მოსაზრების გამო ჭიდაობის ეროვნული ფედერაციის პრეზიდიუმზე დამეტოვებინა ვიცე-პრეზიდენტის თანამდებობა და ასევე პრეზიდიუმის წევრობა! რაც პრეზიდენტმა დაკმაყოფილა!
მთელი ჩემი ცხოვრება დღემდე ვემსახურე ჩემს სამშობლოს სიცოცხლის ფასად! არ გამიცვლია ჩემი სამშობლოს სალი კლდეები სხვის შემოთავაზებულ დღეს დაუჯერებელ სიმდიდრეზე! და თუ რა შევძელი ეს ღმერთმა და მთელმა ჩემა ერმა იცის, რომელიც უსაზღვრო სიყვარულით მაძლიერებს სადაც არ უნდა ვიყო მთასა თუ ბარში!
ასე რომ ყველაზე დიდი თანამდებობა ჩემთვის იყო და არის ღმერთისა და სამშობლოს სიყვარული. ჭიდაობის ეროვნულ ფედერაციას კი მომავალში ვუსურვებ დიდ წარმატებებს ჩვენი სამშობლოს სადიდებლად..."
შეგახსენებთ, რომ ლუკა კურტანიძე საქართველოს ჭიდაობის ფედერაციის პრეზიდენტის პოსტს 2012 წლის დეკემბრიდან 2014 წლის დეკემბრამდე იკავებდა. მოგვიანებით ვეტერანმა სპორტსმენმა პარლამენტში გადაინაცვლა. 2015 წელს, ის გარდაცვლილი დეპუტატის თამაზ ავდლიანის ადგილმონაცვლე გახდა და პარლამენტში შევიდა. პოლიტიკური კარიერის დასრულების შემდეგ კი სამუშაოდ ისევ ფედერაციაში გადაინაცვლა.