ერთი ვერსიით, ამ ოპერაციაში შესაძლოა, უცხოურ სპეცსამსახურებსაც მიეღოთ მონაწილეობა - რას წერს რუსული მედია სატვირთოზე, რომელსაც ყირიმის ხიდის აფეთქებას უკავშირებენ
8 ოქტომბერს, გამთენიისას, ყირიმის (ქერჩის) ხიდი აფეთქდა, რომელსაც არა მარტო სამხედრო-სტრატეგიული და ინფრასტრუქტურული დანიშნულება აქვს, არამედ რუსეთისთვის ყირიმის ანექსიის სიმბოლოცაა.
რუსეთის პრეზიდენტმა ვლადიმერ პუტინმა განაცხადა, რომ აფეთქება ყირიმისა და რუსეთის დამაკავშირებელ მთავარ ხიდზე უკრაინის სპეცსამსახურების მიერ დაგეგმილი ტერორისტული აქტი იყო.
- რუსული მედია და "ტელეგრამში“ რუსული არხები აღწერენ იმ სატვირთო ავტომობილის სავარაუდო მარშრუტს, რომელიც 8 ოქტომბერს ყირიმის ხიდზე აფეთქდა.
რუსეთის პრეზიდენტ ვლადიმერ პუტინთან შეხვედრისას საგამოძიებო კომისიის თავმჯდომარემ, ალექსანდრე ბასტრიკინმა 9 ოქტომბერს განაცხადა, რომ სატვირთო ავტომობილის მარშრუტი დადგენილია. მისი თქმით, ქვეყნები, სადაც სატვირთო გადაადგილდებოდა, არის სომხეთი, საქართველო, ბულგარეთი და ასევე სატვირთოს მარშრუტში შედიოდა ჩრდილოეთ ოსეთი და კრასნოდარის მხარე.
- "ეს არის ბულგარეთი, ეს არის საქართველო, ეს არის სომხეთი, ჩრდილოეთ ოსეთი და კრასნოდარის ტერიტორია“, - განაცხადა ბასტრიკინმა.
"ტელეგრამ“ არხმა "ბაზამ“ კი გაავრცელა ინფორმაცია, რომ სატვირთო, რომელსაც ასაფეთქებელი ნივთიერება გადაჰქონდა, რუსეთში ქართული ნომრის მქონე მანქანით შეიტანეს. ამ ინფორმაციაზე, ისევე როგორც ბასტრიკინის განცხადებაზე, ხელისუფლებას ჯერჯერობით კომენტარი არ გაუკეთებია.
როგორც "ბაზა“ წერს, სატვირთო მანქანამ განბაჟება სომხეთის ტერიტორიაზე გაიარა. აღსანიშნავია, რომ სომხეთის სახელმწიფო შემოსავლების კომიტეტში მანქანის მარშრუტზე კომენტარს ჯერჯერობით არ აკეთებენ.
- მას შემდეგ, რაც მანქანამ გადაკვეთა საზღვარი (სავარაუდოდ, საუბარია საქართველო რუსეთის საზღვარზე), კრასნოდარის ტერიტორიაზე გადმოტვირთეს და სხვა სატვირთოში მოათავსეს, პირველი სატვირთო კი ჩრდილოეთ ოსეთის ტერიტორიაზე დაბრუნდა“, - წერს "ბაზა.“
სავარაუდო მარშურუტს უფრო დეტალურად აღწერს კრემლის მხარდამჭერი სამხედრო ჟურნალისტი ალექსანდრე კოცი. Комсомольская правда აქვეყნებს მის სტატიას, სადაც ჟურნალისტი ამტკიცებს, რომ ამ ოპერაციაში ორი სატვირთო ავტომობილი იყო ჩართული.
ჟურნალისტი წერს, რომ ტვირთი საქართველოში, ფოთის პორტში, ბულგარეთიდან საზღვაო გზით შეიტანეს.
ფოთიდან სომხეთში ჩაიტანეს, სადაც განაბაჟეს, შემდეგ ტვირთი ისევ საქართველოში დააბრუნეს და ზემო ლარსის გამშვები პუნქტით რუსეთის ტერიტორიაზე შეიტანეს.
- ვარაუდობენ, რომ ტვირთი კრასნოდარში სხვა სატვირთო ავტომობილში გადაიტანეს. რომელიც შემდეგ ყირიმისკენ გაემართა. ჟურნალისტი ეჭვობს, რომ ამ ოპერაციაში შესაძლოა, უცხოელი სპეცსამსახურების წარმომადგენლებს მიეღოთ მონაწილეობა.
მანამდე ცნობილი გახდა, რომ ყირიმის ხიდზე აფეთქებული სატვირთოს მძღოლი 51 წლის მაჰირ იუსუბოვი იყო. რუსული მედიის ცნობით, მან სავარაუდოდ, ინტერნეტით მიიღო შეკვეთა ტვირთის გადატანაზე. რუსეთის ფედერაციის წყაროები ამბობენ, რომ მძღოლს ბრმად იყენებდნენ, ანუ, სავარაუდოდ, მან არ იცოდა დაგეგმილი აფეთქების შესახებ.
წყარო: ekhokavkaza.com