"მიგიყვანთ ნიკოლაევში, ან ზაპოროჟიეში და იმდენი იმღერეთ, რამდენიც გინდათ" - "მის ყირიმი 2022" "червона калина"-ს სიმღერის გამო დააჯარიმეს
"მის ყირიმი 2022", ოლგა ვალიევა უკრაინული პატრიოტული სიმღერის, "червона калина“-ს სიმღერისთვის 40 000 რუსული რუბლით (დაახლოებით 680$) დააჯარიმეს, - ამის შესახებ რუსული სახელმწიფო მედია იტყობინება.
როგორც რუსული სახელმწიფო სააგენტო TASS წერს, ვალიევა პატიმრობას მხოლოდ იმიტომ გადაურჩა, რომ არასრულწლოვანი შვილები ჰყავს.
ოკუპირებული ყირიმის ე.წ. შინაგან საქმეთა სამინისტროს სპიკერმა ვიდეო მიმართვაში განაცხადა, რომ მათ ინტერნეტში ვიდეო აღმოაჩინეს, რომელშიც "ორი გოგონა ექსტრემისტული ორგანიზაციის საბრძოლო ჰიმნს მღეროდა". ვიდეოში ასევე ნათქვამია, რომ მათ გოგონები დააკავეს, რადგანაც გაჩნდა ეჭვი, რომ ისინი "არაკანონიერ ქმედებებს ჩადიოდნენ, რომელიც რუსეთის ფედერაციის შეიარაღებული ძალების დისკრედიტაციისკენ იყო მიმართული."
მოგვიანებით, ისინი სასამართლომ დამნაშავეებად სცნო და ვალეევას მეგობარს 10-დღიანი პატიმრობაც მიესაჯა. შეგახსენებთ, რომ "червона калина" არის პატრიოტული უკრაინული სიმღერა, რომელიც ქვეყანაში რუსეთის შეჭრის შემდეგ, მსოფლიოს მასშტაბით გახდა პოპულარული.
ოლეგ კრიუჩკოვმა, ოკუპირებული ყირიმის ე.წ. მთავრობის ადმინისტრაციის ხელმძღვანელის მრჩეველმა Telegram-ზე დაწერა, - "ყირიმში ნორმალური უკრაინული სიმღერებისთვის არავინ ისჯება, მაგრამ აქ ნაციონალისტური საგალობლების გალობას არავინ დაუშვებს! თუ "червона калина"-ს ან "Батько наш Бандера"-ს სიმღერა გსურთ, პლატფორმას ჩვენვე მოგცემთ - მიგიყვანთ ნეიტრალურ ტერიტორიაზე ნიკოლაევში ან ზაპოროჟიეში და იმდენი იმღერეთ, რამდენიც გინდათ."
წყარო: cnn
მოამზადა: ანა სიბოშვილმა