"წყაროსგან შევიტყე, რომ იგეგმებოდა მამაჩემის გლდანის ციხეში გადაყვანა, სადაც არ იქნებოდა საკანში მარტო და მე დაუყოვნებლივ შევატყობინე სახალხო დამცველს" - ნინი გოგაშვილი

სუს-ის ყოფილი მაღალჩინოსნის სოსო გოგოშვილის შვილის ნინი გოგაშვილის განცხადებით, სახალხო დამცველის წარმომადგენელმა სოსო გოგაშვილი რუსთავის მე-12 საპატიმრო დაწესებულებაში მოინახულა. როგორც ნინი გოგაშვილმა „ინტერპრესნიუსთან“ საუბარში განმარტა, ოჯახმა სანდო წყაროსგან მიიღო ინფორმაცია, რომ იგეგმებოდა სოსო გოგაშვილის გლდანის მე-8 დაწესებულებაში გადაყვანა, რის შემდეგაც ოჯახმა პროცესში ჩართვა სახალხო დამცველის აპარატს სთხოვა.

ნინი გოგაშვილის განცხადებით, სოსო გოგაშვილს ჯერჯერობით არ აქვს ინფორმაციას იმასთან დაკავშირებით, აპირებენ თუ არა რუსთავის სასჯელაღსრულების დაწესებულებიდან მის სადმე გადაყვანას.

"მას შემდეგ, რაც ჩვენ შევიტყვეთ ინფორმაცია სანდო წყაროსგან, რომ იგეგმებოდა მამაჩემის გლდანის მერვე დაწესებულებაში გადაყვანა, სადაც არ იქნებოდა საკანში მარტო, მე დაუყოვნებლივ შევატყობინე სახალხო დამცველს ამის შესახებ და ოპერატიულად განახორციელა რეაგირება სახალხო დამცველის აპარატმა. მოქმედი ხელისუფლების პირობებში, ნებისმიერ პროვოკაციას შესაძლოა ჰქონდეს ადგილი. მამაჩემმა თავიდანვე აღნიშნა, რომ მას სასამართლოზე დასწრებაც კი არ სურს, ვინაიდან გზაში შესაძლოა, რაიმე პროვოკაციას ჰქონდეს ადგილი. ამიტომ თავიდანვე ოჯახი წინააღმდეგი ვიყავით და ასევე მამაჩემიც, რომ იგი შესაძლოა, გადაიყვანონ და საერთოდ საკანი დაატოვებინონ, ეს იქნება საშხაპეში გასვლა, იმის გამო, რომ დაურეკოს შინაგან საქმეთა მინისტრმა ისევ და დაემუქროს თუ ა.შ. სახალხო დამცველის წარმომადგენლმა მოინახულა მამაჩემი, ის თავს კარგად გრძნობს. მამაჩემს არ აქვს ინფორმაცია, რომ შესაძლოა იგეგმებოდეს მისი გადაყვანა. იმედია, ამ რეალობის წინაშე არ აღმოვჩნდებით და არ დადგება ეს ფაქტი. მამაჩემი ასევე იმის შესახებ არის ინფორმირებული, რომ თუ დადგება დღის წესრიგში მისი სადმე გადაყვანა, მისი სურვილის საწინააღმდეგოდ, ის აუცილებლად სახალხო დამცველის წარმომადგენელს შესაბამის ნომერზე დაუკავშირდება, რის უფლებაც აქვს პატიმარს და ჩვენც დაუყოვნებლივ გავაპროტესტებტთ ამ ფაქტს.

სახალხო დამცველი პერიოდულად ისედაც ინახულებს პატიმარს, მისი უსაფრთხოების საკითხი თუ არის ეჭვქვეშ და ამ შემთხვევაში მამაჩემის უსაფრთხოების საკითხი ეჭვქვეშ არის. როგორც იცით, უკვე გაანადგურეს ერთი კვირის ჩანაწერები და იუსტიციის მინისტრმა, რატი ბრეგაძემ მოგვახსენა, რომ თითქოს გარკვეული ხარვეზი დაფიქსირდა და ეს ფიქსირდება ხოლმეო - მომავალშიც შეიძლება, ეს ხარვეზი დაფიქსირდეს და მამაჩემის უსაფრთხოება ნამდვილად არ არის დაცული რუსთავის მეთორმეტე დაწესებულებაში. შესაძლოა კიდევ გაანადგურონ ჩანაწერები და მამაჩემის სიცოცხლეს და უსაფრთხოებას დაემუქროს საფრთხე. ამიტომ მე სახალხო დამცველთან მაქვს მუდმივი კავშირი და სახალხო დამცველი მუდმივად ზრუნავს ადამიანების უფლებების დაცვაზე მათ შორის მამაჩემზეც“,- განაცხადა ნინი გოგაშვილმა.