"ვგლოვობთ სანუკვარი მმართველისა და საყვარელი დედის გარდაცვალებას" - მეფე ჩარლზის განცხადება დედოფალ ელისაბედის გარდაცვალების შემდეგ
დიდი ბრიტანეთის სამეფო ოჯახი ახალი მმართველის, მეფე ჩარლზის განცხადებას ავრცელებს:
"ჩემი უძვირფასესი დედის, მისი უდიდებულესობა დედოფლის გარდაცვალება ჩემთვის და მთელი ჩემი ოჯახისთვის უდიდესი მწუხარების მომენტია. ჩვენ ვგლოვობთ სანუკვარი მმართველისა და საყვარელი დედის გარდაცვალებას.
ვიცი, რომ მისი დაკარგვა მთელ ქვეყანაში, სამეფოებსა და თანამეგობრობაში და მთელს მსოფლიოში მკაფიოდ იგრძნობა. გლოვისა და ცვლილებების ამ პერიოდის განმავლობაში, მე და ჩემი ოჯახი, დედოფლის ღრმა პატივისცემით და დიდი სიყვარულით ვინუგეშებთ თავს ".
დიდი ბრიტანეთის დედოფალი ელისაბედ მეორე 96 წლის ასაკში გარდაიცვალა. ინფორმაციას ბრიტანული მედია ბუკინგემის სასახლეზე დაყრდნობით ავრცელებს. განცხადებაში წერია: "დედოფალმა მშვიდად განისვენა ნაშუადღევს ბალმორალში. მეფე და დედოფალი კონსორტი ამ საღამოს ბალმორალში დარჩებიან და ლონდონში ხვალ დაბრუნდებიან".
დედოფალ ელისაბედს ავტომატურად ჩაანაცვლებს მისი ვაჟი, 73 წლის უელსის პრინცი ჩარლზი. მისი ოფიციალური ტიტული "მეფე ჩარლზ III" იქნება.
დედოფალი ელისაბედი მისი მეუღლის და ედინბურგის ჰერცოგის, პრინცი ფილიპის გარდაცვალებიდან 17 თვეში აღესრულა.
ელისაბედ II ტახტზე 70 წლის წინ, 1952 წელს ავიდა და ის ბრიტანეთის ისტორიაში ყველაზე ხანგრძლივი დროით მმართველობის სტატუსის მქონე მონარქია. ელისაბედ მეორე გაერთიანებული სამეფოს გარდა კიდევ 14 დამოუკიდებელი სახელმწიფოს, მათ შორის კანადის, ავსტრალიისა და ახალი ზელანდიის, მეთაური იყო.
წყარო: bbc
მოამზადა: ანა სიბოშვილმა
ნახეთ ასევე: