როგორ იქცა ერთ დროს შინიდან გაქცევაზე მეოცნებე დარია დუგინა პუტინის პროპაგანდისტად და მამის იდეების მემკვიდრედ - "ადრე ვერც იფიქრებდი, რომ ის მისი ქალიშვილი იყო"
20 აგვისტოს საღამოს, ფილოსოფოსისა და პუტინის რეჟიმის ერთ-ერთი ყველაზე გამორჩეული იდეოლოგის, ალექსანდრე დუგინის ქალიშვილი დარია დუგინა, მანქანის მართვისას აფეთქდა და ადგილზე გარდაიცვალა.
მოგვიანებით გამომძიებლებმა განაცხადეს, რომ "ჯიპში" ასაფეთქებელი მოწყობილობა 400 გრამი ტროტილი იყო ჩამონტაჟებული. რუსულმა მედიამ მომხდარში უკრაინული მხარე დაადანაშაულა, მაგრამ მომხდარიდან რამდენიმე საათში ალექსანდრ დუგინის ქალიშვილის ლიკვიდაციაზე პასუხისმგებლობა "ეროვნულმა რესპუბლიკურმა არმიამ” აიღო.
ბოლო წლებში დარია დუგინა მამის ერთ-ერთი უახლოესი თანამოაზრე გახდა. ამავდროულად, იგი აქტიურად ითვისებდა დამოუკიდებელი "პოლიტოლოგის“ და პუბლიცისტის როლს. ფსევდონიმით - "პლატონოვა", ის საუბრობდა პროსამთავრობო მედიაში, აკრიტიკებდა დასავლეთს და მიესალმებოდა რუსული ჯარების შესვლას უკრაინაში.
უკრაინული მედია, წერს, თუ როგორ გადაიქცა კეთილი და თავისუფალი გოგონა, ომის მხურვალე მხარდამჭერად.
- ”ძნელი იყო იმის თქმა, რომ ის დუგინის ქალიშვილია”
დარია დუგინა დაიბადა 1992 წლის 15 დეკემბერს ალექსანდრე დუგინისა და ფილოსოფოსის ნატალია მელენტიევის ოჯახში. 2014 წელს დაამთავრა მოსკოვის სახელმწიფო უნივერსიტეტის ფილოსოფიის ფაკულტეტი, შემდეგ კი დაწერა სადოქტორო დისერტაცია ძველი ბერძენი ფილოსოფოსის პლატონის პოლიტიკური ფილოსოფიის ინტერპრეტაციების შესახებ. "მედუზას“ წყარო იხსენებს, რომ დუგინა ერთ-ერთი ყველაზე ნიჭიერი და "ჭკვიანი“ სტუდენტი იყო.
ვიქტორია სკუიბედინა დუგინას ნაცნობია. ქალი ამბობს, რომ სტუდენტობის პერიოდში ფილოსოფოსის ქალიშვილი რამდენჯერმე აპირებდა სახლიდან გაქცევას, მაგრამ რატომღაც, ვერ გაბედა. მას უყვარდა ოჯახი, ძმა. ერთხელ, შუაღამისას, ჯერ ნატალიამ - დაშას დედამ დამირეკა, მერე თავად ალექსანდრ დუგინმა, მითხრეს, რომ დაშა გაუჩინარდაო, თუმცა მალევე იპოვეს. როცა ვკითხე, რა მოხდა, აღმოჩნდა, რომ ის, უბრალოდ, იყო იმ ბიჭთან, რომელიც შეუყვარდა. მალევე, სკუიბედინას თქმით, დუგინა სასწავლებლად საფრანგეთში გაემგზავრა.
საფრანგეთში, 2012/13 სასწავლო წელს დუგინამ გაიარა აკადემიური სტაჟირება მიშელ დე მონტენის სახელობის უნივერსიტეტში, რომლის ფარგლებში, იგი "გაეცნო პლატონისტური კვლევის ფრანგულ ტრადიციას“ და ასევე მუშაობდა უცხოურ წყაროებზე საფრანგეთის ბიბლიოთეკებში.
ფილოსოფიის ფაკულტეტის დამთავრების შემდეგ დუგინა ასპირანტურაში შევიდა. 2020 წლამდე ის ატარებდა პრეზენტაციებს და შეიმუშავა საკუთარი სასწავლო გეგმა, რომელიც ასევე ეძღვნებოდა პლატონის ფილოსოფიას.
დუგინას კიდევ ერთი ნაცნობი, რომელიც მას ესაუბრა 2015 წელს (ფილოსოფიის ფაკულტეტის დამთავრების შემდეგ), იხსენებს, რომ დარია მაშინ იყო "ახალგაზრდა, თანამედროვე გოგონა, რომელსაც უყვარდა მუსიკა და თავადაც მღეროდა".
ვიქტორია სკუიბედინა იმ დროს დუგინასთან ერთად იყო, რომელსაც საკუთარი მუსიკალური პროექტი ჰქონდა. ისინი რამდენჯერმე გამოვიდნენ კონცერტებზე. თვითონ დუგინა ფლეიტაზე უკრავდა, მისი ჯგუფი Dasein May Refuse კი - ელექტრონულ მუსიკას.
”მის შესახებ ბევრი რამ მსმენოდა, რატომღაც მკაცრი ადამიანი მეგონა, მაგრამ ძალიან თბილად შემხვდა”, - იხსენებს ერთ-ერთი ძველი ნაცნობი პროროკოვა. - შესანიშნავი და ღრმა მოსაუბრე აღმოჩნდა, ჩვენ განვიხილეთ ყველაფერი, გარდა მამის იდეებისა...“
”რაც ბოლოს ხდებოდა, უცნაური იყო, რადგან მანამდე იგი არ ავლენდა მის მიმართ ინტერესს და მამამისს მასზე არანაირი გავლენა არ ჰქონდა... იყო დრო, ვერც კი იფიქრებდი, ის მისი ქალიშვილი იყო. მოგვიანებით იგი გახდა საერთაშორისო ევრაზიული მოძრაობის აქტივისტი, დაიწყო მამის აუდიტორიისთვის ლექციების წაკითხვა და, როგორც ჩანს, მისი გავლენით, აქტიური მხარდამჭერი გახდა. ამ დროს ჩვენ შევწყვიტეთ ურთიერთობა“, - იხსენებს დუგინას ნაცნობი "მედუზასთან" საუბარში.
- "ქალის ინტუიცია ძლიერია"
მალე დუგინა რადიოსა და ფედერალური არხების ეთერში (რომლებსაც მთლიანად აკონტროლებს კრემლი) გამოჩნდა, ასევე მონაწილეოდა პოლიტიკურ დისკუსიებში. 2021 წლის ნოემბერში, "პირველი არხის" გადაცემაში (იგი ეძღვნებოდა "სამხედრო ისტერიის ინექციას" რუსული ჯარების უკრაინის საზღვარზე გადაყვანის კონტექსტში), დუგინამ უკრაინას "კორდონის სანიტარი" უწოდა, რომელიც აშორებს რუსეთს ევროპასთან".
ახალგაზრდა ქალმა დაიწყო მასალების მომზადება მამის ვებგვერდისთვის. დუგინას ტელეფონის ნომერი მითითებულია მამის პროფილში, როგორც პრესმდივნის კონტაქტი. ქალმა საჯაროდ დაუჭირა მხარი უკრაინაში რუსული ჯარების გაგზავნის გადაწყვეტილებას. 24 თებერვალს სრულმასშტაბიანი ომის დაწყების შემდეგ, თავის "ტელეგრამის" არხზე შემდეგი კომენტარი დაწერა:
"წუხელ მოსკოვის უკაცრიელ ქუჩაზე მივდიოდი და შორიდან დავინახე, რომ ერთ-ერთ სახლზე რუსეთის დროშა ფრიალებდა. მშვიდად შრიალებდა: რუსები მოდიან. ქალის ინტუიცია ძლიერია. რატომღაც ამ სიმშვიდეზე და დროშაზე გავამახვილე ყურადღება. ჩემს თავში სლოგანი გაჩნდა "იმპერია, იყავი!" - გავიღვიძე და იმპერიაზე ფიქრი ახდა.
- 24 თებერვლის შემდეგ...
ომის დაწყებიდან დარია დუგინა ორჯერ იყო დიდი ბრიტანეთისა და ავსტრალიის სანქციების სიაში. ბრიტანეთის ხელისუფლებამ დუგინას სიაში შეყვანა იმით ახსნა, რომ, ის იყო "უკრაინაში რუსეთის შეჭრის შესახებ დეზინფორმაციის ხშირი და ცნობილი წყარო; მხარს უჭერდა და ხელს უწყობდა პოლიტიკას ან ქმედებებს, რომლებიც დესტაბილიზაციას უქმნიდა უკრაინას, ძირს უთხრიდა ან საფრთხეს უქმნიდა მის ტერიტორიულ მთლიანობას, სუვერენიტეტს ან დამოუკიდებლობას“.
ივნისის შუა რიცხვებში დუგინა ეწვია მარიუპოლს, აზოვსტალის ქარხანას. ბრიტანელ ჟურნალისტთან, ბლოგერ გრეჰემ ფილიპსსა და რუსეთის ისლანდიელ ექსპერტ ჰაუკურ ჰაუკსონთან ერთად...
”მიჭირს შედარება იმ დარიასთან, რომელსაც ვიცნობდი და რომელიც შემდგომ ატარებდა აზოვსტალის ამაზრზენ პროპაგანდისტურ ტურს”, - ამბობს ვიქტორია სკუიბედინა, დუგინას ნაცნობი. "დიდი ხანია არ მილაპარაკია მასთან. შესაძლოა მან მართლაც მთლიანად მიიღო მამის იდეები ან შესაძლოა, განაგრძო დუგინის ქალიშვილის როლის თამაში. დაშა პირად ცხოვრებაში და დაშა გარეთ - ეს ყოველთვის ორი განსხვავებული ადამიანი იყო.
- მამა და მისი იდეები
”დიდი პატივია იყო ისეთი ადამიანის ქალიშვილი, როგორიც არის ალექსანდრე დუგინი”, - თქვა დარიამ 2021 წელს მიცემულ ინტერვიუში. - ის, რისთვისაც ადამიანები მთელი ცხოვრება იბრძვიან, ეძებენ რაღაც სიბრძნეს, ცოდნის ერთობლიობას, მე ბავშვობიდან მომცეს. მე ვამაყობ და ყველაფერს გავაკეთებ, რომ ღირსეულად განვადიდო მამაჩემის სახელი, გავაგრძელო მისი იდეები და ბრძოლა“.
ფილოსოფოსის ქალიშვილის ბოლო ინტერვიუ მისი გარდაცვალების დღეს შედგა. როგორც ექსპერტი, დარია დუგინა მონაწილეობდა სერგეი კარნაუხოვის გადაცემაში. დუგინამ თქვა, რომ "დასავლური ტოტალიტარიზმი დასრულდა, "სპეციალური სამხედრო ოპერაცია“, მეჩვენება, ამ მსოფლიო ჰეგემონიის კუბოში ბოლო ლურსმანია...”
”როდესაც წავიკითხე აფეთქების შესახებ, ვიფიქრე, რომ ეს იქნებოდა დარიას ხუმრობა”, - ამბობს ვიქტორია სკუიბედინა, დუგინას მეგობარი Meduza-სთან საუბრისას, ”ვფიქრობდი, რომ თავად გაავრცელა ყალბი ინფორმაცია სიკვდილის შესახებ, შემდეგ კი მოულოდნელად გამოჩნდება, გაიცინებს და იტყვის, რომ ყველაფერი რიგზეა".
იხილეთ ასევე: