დაათვალიერეთ პუტინთან დაახლოებული, სანქცირებული რუსი მილიარდერის მრავალმილიონიანი იახტა, რომელსაც გიბრალტარში, აუქციონზე გაყიდიან (ფოტოები)

ვლადიმერ პუტინთან დაახლოებული რუსი ოლიგარქის დიმიტრი პუმპიანსკის სუპერიახტას, სამშაბათს გიბრალტარის სასამართლოს გადაწყვეტილებით, აუქციონზე გაიტანენ. პუმპიანსკი დასაველთის მიერ სანქციერებული პირების სიაშია. მისი იახტა Axioma კი გიბრალტარმა მარტში, ამერიკული ბანკის JP Morgan-ის მოთხოვნით დააკავა. ბანკი აცხადებს, რომ იახტის მფლობელს, $20 მილიონიანი ვალი ბანკისთვის არ დაუბრუნებია. გიბრალტარის სასამართლოს გადაწყვეტილებით, აუქციონით მიღებული თანხა სწორედ ამ ბანკში გადაირიცხება.

მას მერე, რაც რუსეთი უკრაინაში შეიჭრა, არაერთ რუს მილიარდერს და სახელმწიფო მოხელეს დაუწესა დასავლეთმა სანქციები, რამდენიმე მათგანს იახტაც ჩამოართვეს, თუმცა ეს პირველი შემთხვევაა, როდესაც რუსი ოლიგარქის ქონება აუქციონზე გააქვთ. იახტა შეფასებულია 75 მილიონ დოლარად.

BBC-ის ინფორმაციით, Axioma 72.5-მეტრი სიგრძის იახტაა, მასზე 6 კაბინაა, რომლებშიც 12 ადამიანი თავსდება. ეკიპაჟის 20 წევრისთვის კი დამატებითი სივრცეა გამოყოფილი. იახტაზე არის საცურაო აუზი, ჯაკუზი, სპა და 3D კინოთეატრი.

$75 მილიონის ღირებულების იახტა დიზაინერ ალბერტო პინტოს დიზაინით, 2013 წელს თურქეთში ააწყვეს. მას თავდაპირველად “წითელი მოედანი” ერქვა, შემდგომ კი - Axioma.

ოლიგარქი პუმპიანსკი ფოლადის მილების მწარმოებელი კომპანია OAO TMK-ის მფლობელია. ის 58 წლისაა და დაახლოებით 1,84 მილიარდი ფუნტი სტერლინგის ქონება აქვს. სანქცირებულია დიდ ბრიტანეთის, ევროკავშირისა და აშშ-ს მიერ.