პარლამენტარ დავით კაჭარავას ქონებრივი დეკლარაცია და "ცხელი ფოტოები" ნიციდან - როგორ ისვენებს ყოფილი მორაგბე, შეყვარებულთან ერთად, ფრანგულ კურორტზე?
"ქართული ოცნების“ დეპუტატი დავით კაჭარავა პარლამენტში დიდი რაგბიდან მივიდა. წარმატებული სპორტსმენი საზოგადოებაში ცნობილი, კარგი თამაშის გარდა, პირადი ცხოვრებითაც გახდა... უკვე წლებია, რაც კაჭარავა ტანმოვარჯიშე ქეთი ხატიაშვილზეა შეყვარებული.
ვიდრე წყვილის შესახებ მოგიყვებოდეთ, დავით კაჭარავას მიერ 2022 წელს შევსებულ ქონებრივ დეკლარაციას გაგაცნობთ, რომელიც სხვა ქართველი სპორტსმენებისგან განსხვავებით, საკმაოდ მოკრძალებულად გამოიყურება.
პოლიტიკოსს დეკლარაციაში ოჯახის წევრებად შვილი ნიკოლოზ კაჭარავა, მამა დავით კაჭარავა და ძმა გიორგი კაჭარავა ჰყავს მითითებული.
კაჭარავამ 2018 წელს თბილისში ზანდუკელის ქუჩაზე ბინა და სარდაფი შეიძინა. 230 კვ.მ. საცხოვრებელში პოლიტიკოსმა 137 900 დოლარი გადაიხადა, 16 კვ.მ. სარდაფში კი 1000 დოლარი.
კიდევ ერთი ბინა, ამჯერად ბათუმში - 2015 წელს შეიძინა. 56 კვ.მ. ფართობში 50 000 დოლარი გადაიხადა.
2021 წელს უკვე პოლიტიკაში მოსული კაჭარავა გუდაურში ბინას ყიდულობს და 34 კვ. მ. საცხოვრებლეში 44 ათას დოლარს იხდის...
პოლიტიკოსი ერთ მანქანას Dodge Challenger ფლობს, რომელიც 2017 წელს 14 000 დოლარად შეიძინა.
დეკლარაციის შევსებისას დავით კაჭარავა "საქართველოს ბანკის" მიმდინარე ანგარიშზე ჰქონდა 580 ლარი, იპოთეკურ ბარათზე 1152,43 დოლარი, 360 ევრო...
დავით კაჭარავა ორი შპს-ს მფლობელია, თუმცა, როგორც დეკლარაციიდან ჩანს, ბიზნესიდან შემოსავალი არ ჰქონია.
დეპუტატმა საქართველოს პარლამენტის წევრობის სარგო გასულ კალენდარულ წელს 49 590,72 ლარი მიიღო.
დავით კაჭარავა პარლამენტის წევრობამდე საქართველოს რაგბის კავშირის მოთამაშე გახლდათ, საიდანაც 2021 წელს 6603,48 ლარი, 2 თამაშში გამარჯვების პრემია ჩაერიცხა. თუმცა დეკლარაციაში მითითებულია, რომ თანხები 2020 წლის თამაშების იყო და მოგვიანებით ჩაირიცხა.
დავით კაჭარავამ შვილის სწავლის გადასახადში 9 ათასი ლარი გადაიხადა.
რაც შეეხება ქეთი ხატიაშვილისა და დავით კაჭარავას წყვილს, წარსულში ორივე მათგანი დაქორწინებული იყო, კაჭარავას და ხატიაშვილს პირველი ქორწინებიდან ბიჭი და გოგონა ჰყავთ.
2007 წელს დავით კაჭარავამ ანკა დუნდუაზე იქორწინა. წყვილი წლების განმავლობაში საფრანგეთში ცხოვრობდა, მათთან ერთად იყო საერთო შვილი ნიკოლოზიც... ანკა დუნდუა დღეს ცნობილი ინფლუენსერი და პილატესის სერთიფიცირებული ინსტრუქტორია.
2018 წელს კი მორაგბე უკვე ახალ სიყვარულთან ერთად გამოჩნდა. ოჯახის დანგრევის შემდეგ, მისი რჩეული ტანმოვარჯიშე და პროექტ "ცეკვავენ ვარსკვლავების“ გამარჯვებული ქეთი ხატიაშვილი გახდა. თავიდან წყვილი ჟურნალისტებთან საუბრისგან თავს იკავდნენ, თუმცა მოგვიანებით ქეთიმ ambebi.ge-სთან საკუთარ გრძნობებზე გულახდილად ისაუბრა.
"მე და დათომ ერთმანეთი გადაღებებზე გავიცანით. თავიდანვე არ დაწყებულა ჩვენი ურთიერთობა, დაახლოებით ერთი წელი, მხოლოდ გამარჯობის დონეზე ვიცნობდით ერთმანეთს. ნელ-ნელა გაჩნდა სიმპათია და მას შემდეგ ერთად ვართ. კარგი ურთიერთობა აქვთ ერთმანეთთან ჩვენს შვილებსაც და ეს მიხარია. დათო ყველაფერში გვერდით მიდგას, მართალია საქართველოში ხშირად არ არის, რადგან საზღვარგარეთ თამაშობს, თუმცა ყოველთვის ვგრძნობ მის გვერდით დგომას და ეს მსიამოვნებს. რთულია, რა თქმა უნდა, მაგრამ ჯერჯერობით ეს პრობლემა არაა. როცა ურთიერთგაგებაა ორ ადამიანს შორის, სიშორე პრობლემა არაა...“ - ამბობდა მაშინ ქეთი.
კაჭარავას პოლიტიკაში წასვლამდე ქეთი ხატიაშვილის "ინსტაგრამის" გვერდიდან შეყვარებულთან ერთად გადაღებული ყველა ფოტო გაქრა, რამაც გააჩინა ეჭვი, რომ მორაგბე ცნობილ ტანმოვარჯიშეს დაშორდა. ამ ამბიდან რამდენიმე თვეში, ქეთი ამჯერად უკვე დეპუტატის ამპლუაში მყოფი კაჭარავას გვერდით გამოჩნდა. წყვილი შერიგდა, მაგრამ ამჯერად, როგორც ჩანს, ხატიაშვილმა გადაწყვიტა, რომ მათ ურთიერთობაზე ღიად აღარ ესაუბრა.
კაჭარავა და ხატიაშვილი ოფიციალურ ქორწინებაში არ არიან, თუმცა ბევრს მოგზაურობენ, უქმეებს კი საქართველოს სხვადასხვა ქალაქებში ატარებენ... ამჯერად ცხელ ზაფხულს ნიცას შეაფარეს თავი... ამის ამსახველ ფოტოებს და ვიდეოს "ინსტაგრამში" ქეთი ხატიაშვილი ავრცელებს.
