სტივენ სიგალი ოკუპირებულ დონბასში ჩავიდა და ომზე დოკუმენტური ფილმის გადაღებას გეგმავს - "მას სურს, ომის შესახებ საზოგადოების აღქმა შეცვალოს"
ამერიკელი მსახიობი სტივენ სიგალი, რომელიც პუტინის გულშემატკივარი და მხარდამჭერია, ოკუპირებულ დონბასში ჩავიდა. როგორც "მედუზა“ წერს. სიგალი დონბასში ომის შესახებ დოკუმენტური ფილმის გადაღებას გეგმავს.
"სტივენმა თქვა, რომ იმ ადამიანების 98%, რომლებიც კონფლიქტზე მედიაში საუბრობენ, დონბასში არასდროს ჩასულან. ამიტომ მსოფლიომ არ იცის სიმართლე და მას სურს შეცვალოს ომის შესახებ საზოგადოების, მსოფლიოს აღქმა“, - წერს "ტელეგრამზე" ოკუპირებული დონეცკის ე.წ. სახალხო რესპუბლიკის "ხელმძღვანელი" დენის პუშილინი.
დონბასში მყოფი სიგალის ფოტოები სოციალურ ქსელში რუსმა პროპაგანდისტმა ვლადიმერ სოლოვიოვმა გამოაქვეყნა. ფოტოებზე ჩანს, როგორ აკვირდება მსახიობი ოლენივკაში ნანგრევევს.
"ჩანს ამერიკული რაკეტების ფრაგმენტები, რაც ადასტურებს კიევის მონაწილეობას საკუთარი ჯარისკაცების ხოცვაში“, - წერს სოლოვიოვი.
- ცნობისთვის, უკრაინული მხარის განცხადებით, ოლენივკას ციხეზე თავდასხმა რუსმა ოკუპანტებმა მოაწყვეს რათა დაეფარათ უკრაინელი სამხედრო ტყვეების წამების ამსახველი ფაქტები. მოსკოვი კი ბრალდებას უარყოფს.
რაც შეეხება სტივენ სიგალს, მას არაერთხელ გამოუხატავს პუტინის პოლიტიკის მიმართ საჯაროდ მხარდაჭერა. უფრო მეტიც, ჰოლივუდის ვარსკვლავმა 10 აპრილს, მაშ8ინ როცა რუსეთი უკრაინულ ქალაქებსა და სოფლებს ბომბავდა, თავისი 70-ე დაბადების დღე მოსკოვში აღნიშნა.
დაბადების დღეზე სტუმრებს შორის იყვნენ კრემლის პროპაგანდისტები, ვლადიმირ სოლოვიოვი და მარგარიტა სიმონიანი.
სოლოვიოვი ღონისძიების წამყვანი იყო და ასევე თარჯიმნის ფუნქციას ასრულებდა. "ჩემთვის დიდი პატივია, რომ აქ ხართ - ჩემი ოჯახი და მეგობრები. მიყვარხართ ყველა, ამ რთულ დროს ჩვენ ერთად ვართ“, - მიმართა სტივენ სიგალმა შეკრებილ საზოგადოებას. აღსანიშნავია, რომ სიგალო რუსეთის მოქალაქეა.