21
მაისიდღის ზოგადი ასტროლოგიური პროგნოზი
სრულიად საქართველოს კათოლიკოს-პატრიარქი ილია მეორე სამძიმარს უცხადებს გუდაურში მომხდარი ავიაკატასტროფისას დაღუპულთა ოჯახის წევრებსა და ახლობლებს.
"დიდია ჩვენი გულისტკივილი ა.წ. 29 ივლისს გუდაურში მომხდარი ტრაგედიის გამო, რომელმაც რვა პიროვნება იმსხვერპლა და ქვეყანაში დიდი მწუხარება გამოიწვია.
ამ ადამიანების ყოველდღიური საქმიანობა სხვაზე ზრუნვასთან იყო დაკავშირებული და მეტად მნიშვნელოვანია, რომ ამქვეყნიური ცხოვრებაც ასევე დაასრულეს.
ვერტმფრენში მყოფნი, ფაქტობრივად, მოყვასის გადარჩენისთვის ზრუნვას შეეწირნენ და სიცოცხლე გაიღეს გაჭირვებაში მყოფთა დასახმარებლად, რაც ღვთის წინაშე უდიდესი მადლია.
აღვავლენთ ლოცვებს ზაზა ლორიას, ანდრო ქუჯაშვილის, გიორგი მარგიანის, კახა ტორჩინავას, დიმიტრი ქააძეს, გიორგი ვენეცკის, ლევან ჩოხელისა და ქეთევან გულაღაშვილის უკვდავ სულთათვის, რათა მათ სავანესა მართალთასა, განისვენონ, ხოლო გარდაცვლილთა ოჯახის წევრებსა და ახლობლებს უფალმან მოანიჭოს ურყევი რწმენა და სასოება მარადიული ცხოვრებისა, ლოცვის ძალა და მშვიდობა." - აღნიშნულია საპატრიარქოს საზოგადოებასთან ურთიერთობის სამსახურის "ფეისბუქის" ოფიციალურ გვერდზე.
გუდაურში გუშინ მომხდარმა უმძიმესმა ტრაგედიამ მთელი ქვეყანა შეძრა. კატასტროფა განიცადა ვერტმფრენმა, სადაც პარაპლანით ფრენისას ჩამოვარდნილთა დასახმარებლად წასული მაშველები და ეკიპაჟის სხვა წევრები იმყოფებოდნენ.
ვერტმფრენის ბორტზე იმყოფებოდნენ: მაშველები - კახა ტორჩინავა, გიორგი მარგიანი; მფრინავები - ანდრო ქუჯოშვილი, ლევან ჩოხელი, ზაზა ლორია, დიმა ქააძე; სასწრაფოს დახმარების ექიმები - ქეთი გულაგაშვილი, გიორგი ვენეცკი.
ლევან ჩოხელს, ზაზა ლორიას და დიმა ქააძეს წლების სამუშაო გამოცდილება ჰქონდათ და მათ ურთულეს სამაშველო ოპერაციებს ანდობდნენ.
