"სიკვდილით დაისჯებით თქვენს აფთრებთან და საელჩოებთან ერთად. ბარბაროსული ვერშემდგარი იმპერია განადგურდება" - "აზოვის" პოლკის მიმართვა პუტინს
ელენოვკაში უკრაინელი სამხედრო ტყვეების მკვლელობის შემდეგ, "აზოვის" პოლკში აცხადებენ, რომ რუსეთის პრეზიდენტ ვლადიმერ პუტინს სასჯელი ელის. აღნიშნულის შესახებ ვიდეომიმართვაში "აზოვის" დროებითმა მეთაურმა მიკიტა ნადტოჩიმ განაცხადა.
"დღეების განმავლობაში ისინი იტყუებოდნენ უკრაინის არმიის შესახებ და დღეს თავისი დანაშაული საელჩოს განცხადებით დაადასტურეს.
მინდა შევახსენო პუტინს, რომელსაც ამ დანაშაულისთვის პასუხისმგებლობა პირადად ეკისრება, რომ ჩამომხრჩვალის სახლში თოკზე არ ლაპარაკობენ.
თავად დაისჯებით სიკვდილით თქვენს აფთრებთან და საელჩოებთან ერთად. ყველაფერი ისე იქნება, როგორც გიყვართ, ცნობებითა და ბეჭდებით, საერთაშორისო ტრიბუნალის გადაწყვეტილებით. ბარბაროსული ვერშემდგარი იმპერია განადგურდება,“ – განაცხადა "აზოვის“ მეთაურის მოვალეობის შემსრულებელმა.
- აღსანიშნავია, რომ ვიდეომიმართვის გავრცელებამდე ბრიტანეთში რუსეთის საელჩომ "აზოვის“ პოლკის დატყვევებული მებრძოლების სიკვდილით დასჯა მოითხოვა. სიკვდილით დასჯის ფორმად საელჩო ჩამოხრჩობას მიუთითებს. შესაბამისი განცხადება ბრიტანეთში რუსეთის საელჩოს "ტვიტერის“ გვერდზე გავრცელდა.
განცხადებაში აღნიშნულია, რომ "აზოვის“ პოლკში ნამდვილი ჯარისკაცები არ არიან და დამამცირებელ სიკვდილს იმსახურებენ.
"აზოვის“ "ბოევიკები“ სიკვდილით დასჯას იმსახურებენ, მაგრამ სიკვდილს არა ჩაცხრილვით, არამედ ჩამოხრჩობით, იმიტომ რომ ისინი ნამდვილი ჯარისკაცები არ არიან. ისინი დამამცირებელ სიკვდილს იმსახურებენ“,- ნათქვამია საელჩოს განცხადებაში.
ამასთან, გუშინ ელენოვსკის კოლონია დაიბომბა, რის შედეგადაც რუსმა "ბოევიკებმა“ 50 უკრაინელი სამხედრო ტყვის, მათ შორის "აზოვის“ მებრძოლების გარდაცვალების შესახებ განაცხადეს.