"ქალი 15 წელია განქორწინებულია, თუმცა ბიჭს ეს ურთიერთობა არ მოსწონდა, სურდა, რომ დედამისი და მისი მეგობარი კაცი დაქორწინებულიყვნენ" - რა გახდა ფონიჭალაში მომხდარი მკვლელობის მიზეზი

"კვირის პალიტრამ" თბილისში, ფონიჭალაში მომხდარი მკვლელობის ახალი დეტალები გაარკვია. როგორც ირკვევა, დანაშაული ეჭვიანობის ნიადაგზე მოხდა. 22 წლის ნ.ვ.-მა საკუთარი დედა და მისი მეგობარი მამაკაცი მ.მ. ყელის არეში დაჭრა. რის შემდეგაც მამაკაცი ადგილზევე გარდაიცვალა. ქალი კი კლინიკაში გადაიყვანეს. ამ ეტაპზე მის სიცოცხლეს საფრთხე არ ემუქრება. მკვლელობის დეტალებზე ადგილობრივები "კვირის პალიტრას" ესაუბრნენ.

- ცუდი ამბავი მოხდა, თუმცა, სოფელში თითქოს კიდეც ველოდით ამ ამბავს. საქმე ის არის, რომ მ.მ. და ნ.ვ.-ს დედა დიდი ხანია ერთად არიან, რაც ბიჭს არ მოსწონდა. მიუხედავად იმისა, რომ დედამისი ქმართან, ნ.ვ.-ს მამასთან 15 წლის განქორწინებულია. ნ.ვ.-ს მამამ ის თავად მიატოვა. თუმცა, ნ.ვ. ზოგადად ამ ურთიერთობის წინააღმდეგი კი არ იყო, უნდოდა, რომ დედამისი და მისი მეგობარი მამაკაცი დაქორწინებულიყვნენ. მ.მ. გააფრთხილა კიდეც, - სოფელში ხალხი ყველა დედაჩემზე და შენზე ლაპარაკობს და მრცხვენია, უფლებას არ მოგცემ ასე გაგრძელდეს, თანაც, ქვრივი ხარ, ცოლი არ გყავს და თუ დედაჩემთან ურთიერთობა გინდა, დაქორწინდით, თუ არა და რაღაც ცუდს ჩავიდენ, ორივეს დაგხოცავთო.

- ეს რას ნიშნავს?! ნუთუ არავინ შეეწინააღმდეგა, არავინ უთხრა, რომ ადამიანის მკვლელობის უფლება არ ჰქონდა?!

- ვინ გითხრათ, რომ არ შევეწინააღმდეგეთ? ვინც მოვახერხეთ ამ ამბავზე ლაპარაკი, დაველაპარაკეთ. ყველას არ გვისმენდა, ამ თემაზე ძალიან ღიზიანდებოდა, მაგრამ ვისაც მოუსმინა, მანაც ასე უთხრა, - დედაშენი და მამაშენი განქორწინებულები არიან, მამაშენს სხვა ოჯახი აქვს; დედამ შენ და შენი ძმა მარტომ გაგზარდათ, ახლა რაღა გინდა, გაუშვი იყოს, რას გიშავებსო. მაგრამ ნ.ვ. ამ სიტყვებზე უფრო გაგიჟდა, - არ დავუშვებ დედაჩემი შინ შუაღამისას მოდიოდეს და მე და ჩემს ძმას გვარცხვენდესო. სხვა აბა, რა გითხრათ, ძალიან ბევრი კიდეც ეთანხმებოდა ნ.ვ.-ს. შეიძლება იმიტომაც, რომ აქამდე წესიერი ახალგაზრდის სახელი ჰქონდა, შრომობდა კიდეც.

ძალიან ცოტაა, ვინც ნ.ვ.-ს დედასაც ამართლებს, ამბობენ, - 40 წლის არის, 15 წლის იყო რომ გათხოვდა და მერე ქმარმა მიატოვა, ახლა ხომ ჰქონდა უფლება, რომ საყვარელი ადამიანი ჰყოლოდაო. მაგრამ ესენი ამის თქმას ხმამაღლა ვერ გაბედავენ. უმეტესობას მიაჩნია, რომ როდესაც შვილები გყავს, მათ ანგარიში უნდა გაუწიო.

- ადვილად კი ამბობთ, მაგრამ ასე არ არის. თავადაც ხომ იცით, რომ 40 წლის ქალს, რომელიც ალბათ 15 წლის ასაკში გარიგებით გაათხოვეს, დღეს მაინც აქვს უფლება საკუთარი პირადი ცხოვრება ჰქონდეს.

- საქმე ასე იოლად არ არის, როგორც გგონიათ. ჩვენ წესები და ადათები გვაქვს, რომელიც ქალმაც უნდა დაიცვას და კაცმაც. განაგრძეთ კითხვა