კელი დეგნანმა მესტიაში სვანური ქუდი მოირგო და სვანურად ცეკვაც სცადა (ფოტოები, ვიდეო)
აშშ-ის ელჩი საქართველოში, კელი დეგნანი მესტიაში იმყოფებოდა, სადაც მუნიციპალიტეტის მერს, კაპიტონ ჟორჟოლიანს შეხვდა. კელი დეგნანმა სვანური ქუდი მოირგო, შესაბამის ფოტოებს ინფორმაციასთან ერთად მესტიის მერია აქვეყნებს:
"მესტიის მუნიციპალიტეტის მერმა კაპიტონ ჟორჟოლიანმა, დაბა მესტიაში, ამერიკის შეერთებული შტატების ელჩთან, ქალბატონ კელი დეგნანთან შეხვედრა გამართა. შეხვედრის თემა გახლდათ მესტიის მუნიციპალიტეტში არსებული სოციალური და ეკონომიკური მდგომარეობა: ქალბატონმა ელჩმა მუნიციპალიტეტის მერისგან მიიღო ინფორმაცია ზემო სვანეთში კულტურული მემკვიდრეობის ძეგლების მდგომარეობის, ტურიზმის მიმართულებით არსებული გამოწვევებისა და ადგილობრივი მოსახლეობის საჭიროებების შესახებ.
მხარეებმა ასევე ისაუბრეს იმ პროექტების შესახებ, რომელიც მუნიციპალიტეტში აშშ-ს მხარდაჭერით განხორციელდა. ქალბატონმა კელი დეგნანმა, კიდევ ერთხელ გამოთქვა მზადყოფნა, მხარი დაუჭიროს მესტიის მუნიციპალიტეტის განვითარების პროცესს.
შეხვედრას ასევე ესწრებოდნენ, მესტიის მუნიციპალიტეტის მერის პირველი მოადგილე, ქალბატონი ნელი ნავერიანი, მერის მრჩეველი კულტურისა და სოციალურ საკითხებში, ლევან კიკვიძე და მერის თანაშემწე კულტურის მიმართულებით, ვახტანგ ფილფანი.
შეხვედრის დასრულების შემდეგ, მუნიციპალიტეტის მერმა აშშ-ს ელჩს სიმბოლური საჩუქრები - სვანური ქუდი და ადგილობრივი მხატვრის, რეზო ხოჯელანის ნამუშევარი გადასცა", - ნათქვამია გამოქვეყნებულ ინფორმაციაში. აშშ-ის საელჩოს "ფეისბუქის" ოფიციალური გვერდი ასევე ავრცელებს ვიდეოს, თუ როგორ ცდილობს ქალბატონი ელჩი სვანურის ცეკვას.