BBC-ის ინფორმაციით, შრი-ლანკის პრეზიდენტმა გადადგომა დაადასტურა
შრი-ლანკის პრეზიდენტმა გოტაბაია რაჯაპაქსამ გადადგომა დაადასტურა, - BBC-ის ინფორმაციით, ამის შესახებ ქვეყნის პრემიერ-მინისტრის ოფისში განაცხადეს.
გამოცემის ცნობით, საპროტესტო აქციის მონაწილეებს პრეზიდენტის სასახლე და პრემიერ-მინისტრის რეზიდენცია კვლავ დაკავებული აქვთ და უარს აცხადებენ დატოვებაზე, ვიდრე ლიდერები არ გადადგებიან.
შრი-ლანკის პარლამენტის თავმჯდომარემ შაბათს განაცხადა, რომ პრეზიდენტი თანამდებობას 13 ივლისიდან დატოვებს.
რაჯაპაქსას ადგილსამყოფელი ამჟამად უცნობია, მაგრამ სამხედრო წყაროებმა BBC-ს განუცხადეს, რომ ის სამხედრო-საზღვაო ძალების ხომალდზე შრი-ლანკის ტერიტორიულ წყლებში იმყოფება.
შეგახსენებთ, ათასობით დემონსტრანტი, რომელიც შრი-ლანკაში ეკონომიკური მდგომარეობის გაუარესებას აპროტესტებს, პრეზიდენტისა და პრემიერ-მინისტრის რეზიდენციებში შაბათს შეიჭრა.