"მაშინ ყველა დავდიოდით ზურაბ ჟვანიასთან ვაშლიჯვარში, მიშასთან - საკრებულოში - ვითხოვდით, რომ ერთად ყოფილიყვნენ" - რას იხსენებს უგულავა 20 წლის წინანდელი მოვლენებიდან?

ყოფილი თბილისის მერი, გიგი უგულავა სოციალურ ქსელში წლების წინ გადაღებულ ფოტოს აქვეყნებს და წერს, რომ აქციები პოლიტიკოსების გარეშე არ გამოდის. მისი აზრით, 20, 24 ივნისის, 3 ივლისის აქციების სწორი ანალიზია საჭირო, რომ შემოდგომაზე იგივე შეცდომები არ განმეორდეს...

გიგი უგულავა:

- 2002 წელია, 7 თუ 8 ივლისი. მოკლედ, 20 წლის წინ. ამ სურათის უკან დიდი შრომა იმალება. პირველ რიგში არასამთავრობოების, სამოქალაქო საზოგადოების. ეს აქცია რომ შემდგარიყო მაშინდელი „ნჯო“-ები, რუსთავი 2-ის დირექტორი ეროსი კიწმარიშვილი და ზოგადად ყველა ჩვენთაგანი, დავდიოდით ოფისიდან ოფისში - ზურაბ ჟვანიასთან ვაშლიჯვარში, მიშასთან - საკრებულოში, სახლში, ოფისში, ახლებთან - ორთაჭალაში. ვთხოვდით, ვითხოვდით, ვაშანტაჟებდით, რომ ერთად ყოფილიყვნენ.

რთული იყო. აბა ეგოები მაშინ გენახათ გინდათ პოლიტიკურ ლიდერებს და გნებავთ ენჯლიდერებს შორის. დღევანდელი ახლოსაც ვერ მივა. რთული იყო ამ დღის ორგანიზება. მერე ბევრჯერ დაიშალენ. 2003-ში ზურა და მიშა ხალხთან ერთად გარეთ აღმოჩნდა, ახლები - შევარდნაძესთან ერთად პარლამენტში. მაგრამ ეს ისტორიაა და ყველას თავის გზა აქვს. ეს პოსტი სხვა რამეზეა.

მაშინ სამოქალაქო საზოგადოება თავის მისიად იმედისმომცემი პარტიების და ლიდერების კოორდინაციას ვთვლიდით, მუდმივად ინტერაქციაში ვიყავით, ვეხმარებოდით. არავის თავში აზრად არ მოუვიდოდა - პოლიტიკოსები არ გვინდა! პირიქით, პოლიტიკოსების იძულებით ვიყავით დაკავებული რომ ერთად ემოქმედათ. აეღოთ პასუხისმგებლობა პროცესებზე. აბა მაშინ იყო თუ იყო პოლიტიკოსებზე დაკომპლექსების კამპანია, მაგრამ ყველას გვესმოდა, რომ პოლიტიკურ პროცესს არა ჩაკეტვა, არამედ მეტი ჩართულობა სჭირდებოდა.

ასე გაგრძელდა 2003-შიც ვარდების რევოლუციის დროსაც. დღეს პირიქით სურათს ვხედავთ, რაც ფუნდამენტურად მცდარად მეჩვენება. ჩემი აზრით, 20, 24 ივნისის. 3 ივლისის აქციების სწორი ანალიზია საჭირო, რომ შემოდგომაზე იგივე შეცდომები არ განმეორდეს. ყველას გვესმის, რომ შეცდომის დაშვების უფლება აღარავის აქვს. ძალიან ცოტა დროა და ძალიან ბევრი რამე დევს სასწორზე. ჭეშმარიტების მომენტი დგება და ჩვენც მზად უნდა დავხვდეთ... - წერს უგულავა.

შეგახსენებთ, რომ სამოქალაქო პროტესტი, რომელსაც მოძრაობა „სირცხვილია“ უდგას სათავეში პოლიტიკოსებისგან გამიჯნულია. მოძრაობის წევრები ცდილობენ, რომ აქციებზე მიკროფონთან მხოლოდ ცნობილ ადამიანებს დაეთმოთ სხვადასხვა სფეროდან და არა, ოპოზიციურ პოლიტიკოსებს. რაც რიგ შემთხვევაში ოპოზიციური პარტიების გაღიზიანებას იწვევს.