22 წლის დანიელმა თავდამსხმელმა 3 ადამიანი იმსხვერპლა - რა მოხდა კოპენჰაგენის ერთ-ერთ უდიდეს სავაჭრო ცენტრში?
3 ივლისს, დანიის დედაქალაქ კოპენჰაგენის ერთ-ერთ სავაჭრო ცენტრში, ახალგაზრდა მამაკაცი შეიჭრა და ხალხს ცეცხლსასროლი იარაღით დაესხა თავს. მასობრივი სროლის შედეგად, სამი ადამიანი დაიღუპა, სამი კი მძიმედ დაშავდა. შეიარაღებულმა პირმა ცეცხლი კოპენჰაგენის უდიდეს სავაჭრო ცენტრ "ფილდსში" გახსნა. პოლიციის მთავარმა ინსპექტორმა სორენ თომასენმა ჟურნალისტებს განუცხადა, რომ დაღუპულთა შორის ორი ახალგაზრდა - 17 წლის ქალ-ვაჟი და ერთიც რუსეთის მოქალაქე 47 წლის მამაკაცია, რომელიც დანიაში ცხოვრობდა. მისივე თქმით, დაშავებულია კიდევ რამდენიმე ადამიანი, მათგან 3 მძიმე მდგომარეობაშია.
ეჭვმიტანილი, 22 წლის ეთნიკურად დანიელი მამაკაცია, რომელიც უკვე დააკავეს და განზრახ მკვლელობის ბრალდება წაუყენეს.
"დარწმუნებულები ვართ, რომ დაკავებული მამაკაცი დამნაშავეა. მას ხელთ ჰქონდა ცეცხლსასროლი იარაღი და ამავე იარაღის საბრძოლო მასალა", - აცხადებს ინსპექტორი სორენ თომასენი. თომასენმა უარი თქვა თავდასხმის მოტივზე საუბრისგან, მაგრამ თქვა, რომ პოლიცია არ გამორიცხავს, ეს "ტერორისტული აქტი" ყოფილიყო.
ერთ-ერთმა თვითმხილველმა, რომელიც სროლის დროს სავაჭრო ცენტრში იმყოფებოდა, თქვა, რომ იქ მყოფებს თავდაპირველად ეგონათ, რომ არეულობა ქურდობის გამო დაიწყო:
"ხალხს ჯერ ეგონა, რომ ქურდი იყო, შემდეგ უცებ სროლის ხმა გავიგე და მაღაზიის დახლის უკან ჩავხტი", - ამბობს რიკე ლევანდოვსკი TV2-თან ინტერვიუში.
მისი თქმით, თავდამსხმელი პირდაპირ ადამიანებს ესროდა:
"ჭერში ან იატაკზე კი არ ისროდა, ხალხისკენ ჰქონდა იარაღი მიმართული".
მეორე თვითმხილველმა კი ასე დაახასიათა თავდამსხმელი:
"ის აგრესიული და გაბრაზებული ჩანდა. ყვირილით დარბოდა, შემდეგ იარაღი აიღო და შუშა ჩალეწა. სახეზე ეტყობოდა, რომ ამაყობდა თავისი ჩადენილით".
პოლიციამ ადგილზე მყოფებს სავაჭრო ცენტრში დარჩენა ურჩია და სთხოვა, დახმარებას დალოდებოდნენ.
"დანიას, კვირას ღამით სასტიკ თავდასხმასთან გამკლავება მოუწია. რამდენიმე ადამიანი დაიღუპა და კიდევ უფრო მეტი დაშავდა. დაზარალდნენ უდანაშაულო ოჯახები, ახალგაზრდები და მოზარდები, რომლებიც საყიდლებზე ან საჭმელად იყვნენ გასულები", - ამბობს დანიის პრემიერ-მინისტრი, მეტე ფრედრიკსენი განცხადებაში.
"გაუგებარია და გულსატკენი. ჩვენი ლამაზი და როგორც წესი, უსაფრთხო დედაქალაქი წამის მეასედში შეიცვალა", - დანანებით ამატებს ის.
სავაჭრო ცენტრთან ახლოს ბრიტანელი მომღერლის, ჰარი სტაილზის კონცერტი უნდა გამართულიყო, რომელიც ტრაგედიის შემდეგ გაუქმდა.
"კოპენჰაგელებთან ერთად მეც მომიკვდა გული. ძალიან მიყვარს ეს ქალაქი. აქაური ხალხი ისეთი თბილი და სიყვარულით სავსეა. მსხვერპლთა ოჯახებისა და სხვა დაზარალებულების მწუხარებას ვიზიარებ", - წერს სტაილზი "ტვიტერზე". მან თაყვანისმცემლებს შოუს გაუქმების გამო ბოდიში მოუხადა და ერთმანეთზე ზრუნვა სთხოვა.
წყარო:bbc
მოამზადა: ანა სიბოშვილმა