პარლამენტთან აქციისთვის "შინ ევროპისკენ“ ემზადებიან: ტერიტორიაზე მოქალაქეები იკრიბებიან - მობილიზებულია პოლიციაც

პარლამენტთან, სადაც აქცია "შინ ევროპისკენ" უნდა გაიმართოს, მოქალაქეები იკრიბებიან. აქციას სხვადასხვა რეგიონის მცხოვრებლებიც შეუერთდნენ.

დაგეგმილი აქციის გამო, ტერიტორიაზე პოლიციისა და სასწრაფო დახმარების ჯგუფებია მობილიზებული.

აქცია "შინ ევროპისკენ", რომელიც სამოქალაქო საზოგადოების ორგანიზებით ტარდება, 20:00 საათზე დაიწყება.

ორგანიზატორებმა 24 ივნისს გამართულ აქციაზე პრემიერ-მინისტრის, ირაკლი ღარიბაშვილის გადადგომა და ეროვნული თანხმობის მთავრობის შექმნა მოითხოვეს, რისთვისაც ხელისუფლებას ერთკვირიანი ვადა მისცეს, რომელიც დღეს იწურება.

თბილისის სახელმწიფო უნივერსიტეტის სტუდენტები უნივერსიტეტის ეზოში შეიკრიბნენ და მსვლელობით რუსთაველის გამზირისკენ მიემართებიან.

მათ ხელში საქართველოს, უკრაინისა და ევროკავშირის დროშებთან ერთად უნივერსიტეტის დროშა უჭირავთ. სტუდენტები სკანდირებენ: "სტუდენტები ვირჩევთ ევროპას”, "მე ვარ ქართველი, მაშასადამე, ვარ ევროპელი” და "თსუ”-ს.

მათთან ერთად მეტროსადგურ „რუსთაველთან“ შეიკრიბებიან და პარლამენტთან დაგეგმილ აქციას შეუერთდებიან "ილიაუნის”, "ჯიპა”-ს, "საქართველოს უნივერსიტეტის”, "კავკასიის უნივერსიტეტის”, "საქართველოს ტექნიკური უნივერსიტეტისა” და სხვა უნივერსიტეტის სტუდენტები

როგორც ცნობილია, აქციის ორგანიზატორების გადაწყვეტილებით, ისინი დღეს ღამით პარლამენტის ტერიტორიაზე დარჩენას გეგმავენ.