"ჩვენი აზრით, საზოგადოებას არასაკმარისად მიეწოდება სიმართლე, თუ რა ვითარებაა საქართველოში დღეს" - როგორ ხსნიან სუბარი, ყაველაშვილი და ხუნდაძე მმართველი გუნდიდან წასვლას
"ქართული ოცნების“ გუნდის ყოფილმა წევრებმა სოზარ სუბარმა, მიხეილ ყაველაშვილმა და დიმიტრი ხუნდაძემ განმარტეს, თუ რატომ გადაწყვიტეს მმართველი პარტიის დატოვება.
სუბაზრის თქმით, ზოგჯერ უბრალოდ დგება საკითხი, როდესაც ქვეყნის ინტერესიდან გამომდინარე, უფრო მეტი უნდა უთხრა ხალხს.
- "საზოგადოებამდე ინფორმაცია მიდის, მაგრამ როცა მმართველ გუნდში ხარ, გარკვეული შეზღუდვები გაქვს, მათ შორის ინფორმაციები, რომლებიც ღიად არ ითქმის, რომლებიც კულუარებში ხდება. ზოგჯერ უბრალოდ დგება საკითხი, როდესაც ქვეყნის ინტერესიდან გამომდინარე, უფრო მეტი უნდა უთხრა ხალხს. მმართველი გუნდის პოზიციიდან გამომდინარე, ამის თქმა არ გამოდიოდა იმიტომ, რომ იძულებული ხარ ანგარიში გაუწიო მეგობრებს, იძულებული ხარ, ანგარიში გაუწიო თანამებრძოლებს“, - განაცხადა სუბარმა.
მისი თქმით, ხალხმა სიმართლე უნდა იცოდეს.
"რთული პერიოდი დგას დღეს ჩვენს რეგიონში, ზოგადად, და საქართველოც ამ რეგიონის ნაწილია. მოგისმენიათ არაერთი განცხადება, როცა პირდაპირ გვთხოვდნენ ომში ჩართვას, იყო ამის პირდაპირი მცდელობები, იყო არაპირდაპირი მცდელობებიც. ერთადერთი, რასაც შეუძლია, ჩვენ ეს საფრთხე თავიდან აგვაცილოს, არის ხალხის მხარდაჭერა და ხალხის განწყობა. ხალხმა უნდა იცოდეს სიმართლე, ერთი მხრივ დგას ომში ჩართვის საფრთხე, მეორე მხრივ, დგას ქვეყნისთვის უმნიშვნელოვანესი გადაწყვეტილების კარიბჭესთან ვდგავართ- ეს არის ევროკავშირში ჩვენი გაწევრიანების შესაძლებლობა. თუკი ახდა მათი განწყობა, ვისაც უნდა ომში ჩართვა, მაშინ ყველაფერი განზე დაგვრჩება. ამიტომ, ჩვენ უნდა ვუთხრათ ხალხს უფრო მეტი სიმართლე, ვიდრე ამის საშუალებას იძლევა ის, როცა მმართველი გუნდის წევრი ხარ“,-განაცხადა სუბარმა.
კითხვაზე, ხომ არ იგეგმება, პრემიერ-მინისტრ ირაკლი ღარიბაშვილის თანამდებობიდან წასვლა და ახალი პოლიტიკური გუნდის შექმნა, სუბარმა უპასუხა, რომ "არაფერი მსგავსი არ იგეგმება და არ მოხდება“.
"საქართველოს მთავრობა, ქართველი ხალხი დღეს უდიდესი გამოწვევის წინაშე ვართ. ქვეყნის სტრატეგიული მიზანი რაციყო, ევროკავშირში გაწევრიანება, აქ ვართ და ყველაფერი უნდა გავაკეთოთ, რომ გაწევრიანება რაც შეიძლება უტკივნეულოდ მოხდეს. უმტკივნეულოში ვგულისხმობ იმას, რომ ომში ჩართვა თავიდან უნდა ავირიდოთ. ომში ჩართვა თუ მოხდა, შემდეგ ყველაფერი აზრს დაკარგავს“, - აღნიშნა სუბარმა.
- "არის საკითხები, რომლებიც გაჟღერდება ხვალ. ამ საკითხებზეც გვექნება მსჯელობა, მივაწოდებთ, რომ იცოდეს ჩვენმა საზოგადოებამ სიმართლე, თუ დღეს საქართველოში რა ვითარებაა და რა მდგომარეობაა, რომ გვქონდეს საერთო აზრი, - ამის შესახებ პარლამენტის დეპუტატმა, მიხეილ ყაველაშვილმა ჟურნალისტებს განუცხადა, რომელმაც "ქართული ოცნება" და საპარლამენტო თანამდებობა დღეს დატოვა.
მისი თქმით, "ქართული ოცნებიდან“ წასვლის შემდეგ მათ ექნებათ მეტი საშუალება, საზოგადოებას სიმართლე მიაწოდონ ისე, რომ ამით "ქართული ოცნება" არ დააზიანონ.
"ჩვენს საზოგადოებას, ჩვენი აზრით, არასაკმარისად მიეწოდება ის სიმართლე, რომელიც აუცილებელია მათ იცოდნენ და ჩვენ, სამმა ადამიანმა გადავწყვიტეთ, რომ ამ სახით შეგვიძლია უფრო მეტი ინფორმაცია მივაწოდოთ, რომ არ დავაზიანოთ "ქართული ოცნება". არის საკითხები, რომლებიც გაჟღერდება ხვალ, ამ საკითხებზეც გვექნება მსჯელობა, მივაწოდებთ, რომ იცოდეს ჩვენმა საზოგადოებამ სიმართლე, თუ დღეს საქართველოში რა ვითარებაა და რა მდგომარეობაა, რომ გვქონდეს საერთო აზრი, მითუმეტეს ჩვენს ამომრჩეველთან.
ჩვენ ვთვლით, რომ რიგ საკითხებში მანამდეც გვქონდა დისკომფორტი, რომ საჭიროა, მეტი ინფორმაცია იცოდეს საზოგადოებამ, მაგალითად - არის უამრავ თემებში, ამ 12 პუნქტთან, ევროკავშირთან, ევროპარლამენტთან, ევროკომისიასთან ურთიერთობები, ["ქართული ოცნება"] მმართველი ძალაა და უნდა გააგრძელოს და ჩვენ გვექნება ამისი თავისუფლება, რომ საზოგადოებას სიმართლე უფრო მეტად მივაწოდოთ“, - განაცხადა მიხეილ ყაველაშვილმა.
- "ქართული ოცნების“ უკვე ყოფილი წევრი დიმიტრი ხუნდაძე აცხადებს, რომ პარტია "ქართულ ოცნებასთან" და მის ლიდერებთან არავითარი ღირებულებითი აზრდასხვადასხვაობა არ აქვს.
როგორც მან მედიასთან განაცხადა, "ქართულ ოცნებასთან“ ყველაფერში თანხმდებიან, გარდა ერთისა, რა დოზით უნდა მიეწოდებოდეს საზოგადოებას სიმართლე.
როგორც ხუნდაძე აცხადებს, იქნებიან საზოგადოებასთან ყველაზე ახლოს და ინფორმაცია, რაც არ აქვს მათგან "ეტაპობრივად მიიღებენ".
"ჩავთვალე ამ ეტაპზე, რომ ეს გადაწყვეტილება იყო მისაღები. ჩვენ "ქართულ ოცნებასთან“, ლიდერებთან, თითოეულ წევრთან არავითარი ღირებულებითი აზრდასხვადასხვაობა არ გვაქვს. პრაქტიკულად ყველა თემაში ვთანხმდებით, გარდა ერთისა, ვერ ვთანხმდებით იმაზე, რა დოზით უნდა მიეწოდებოდეს საზოგადოებას სიმართლე, ინფორმირებული უნდა იყოს მეტად თუ არა. რა თქმა უნდა საზოგადოებამ უნდა იცოდეს მეტი. დღეს მათი როლი ძალიან მნიშვნელოვანია ამ პოლიტიკურ ველზე, ამ რეალობაში. ამიტომ საკითხები, რომელიც არის საჯარო პოლიტიკის და ზოგჯერ არის საკითხები, რომელიც კულისებში იხილება, ვფიქრობ, საზოგადოებამ მეტი უნდა იცოდეს, ვიდრე დღეს იცის. ამიტომ ჩვენი მზიანი იქნება შესრულებული, ჩვენ ვიქნებით საზოგადოებასთან ყველაზე ახლოს და ის ინფორმაცია, რაც მათ დღეს არ აქვთ, ამ ინფორმაციას ეტაპობრივად მიიღებენ ჩვენგან“, - აცხადებს დიმიტრი ხუნდაძე.
ასევე იხილეთ: